Հարավային Կորեայի Անսան քաղաքի դպրոցի փոխտնօրենը, որը «Սեւոլ» լաստանավի փրկված ուղեւորներից մեկն էր, ինքնասպանությամբ վերջ է տվել կյանքին, հաղորդում է «Ռյոնհապ» գործակալութունը:
51-ամյա փոխտնօրենի մարմինը հայտնաբերվել Է ապրիլի 18-ին տեղական ժամանակով ժամը 16:05-ին: Կան ազգանունով տղամարդը կախվել Էր Չինդո մարզասրահից ոչ հեռու գտնվող սոճուց, որտեղ գտնվում են խորտակված նավի բոլոր փրկված ուղեւորները: Ոստիկանության ներկայացուցիչները հայտնել են, որ Կանը մահվանից առաջ գրություն չի թողել:
Ինչպես այսօր հաղորդել Է The Chosun Ilbo թերթը, Հարավային Կորեայի ափերի մոտ ջրասույզ եղած «Սեւոլ» լաստանավի նավապետ Լի Չժուն Սոկը կարող Է դատապատվել հինգ տարվա ազատազրկման եւ դրամական տուգանքի: «Լին եւ նրա անձնակազմը ենթարկվել են քրեական պատասխանատվության: Համապատասխան օրենքների համաձայն՝ նավի նավապետն արտակարգ իրադրության դեպքում պարտավոր Է ձեռնարկել մյուսներին փրկելու անհրաժեշտ քայլեր»,- գրել Է հրատարակությունը: Մինչդեռ, թերթը հիշեցնում Է, որ 69-ամյա նավապետ Լի Չժուն Սոկը եւ անձնակազմի առանձին անդամներ եղել են նրանց թվում, ովքեր առաջինն են հեռացել նավից:
Ինչպես հայտնի Է դարձել, պատահարի պահին նավը վարել Է նավապետի 26-ամյա երրորդ օգնականը, որն ընդամենը մեկ տարվա փորձառություն ունի: Դա, մասնագետների կարծիքով՝ նույնպես նպաստել Է իրադարձությունների ցավալի զարգացմանը:
Ողբերգության վայրում փրկարարական աշխատանքները վերսկսվել են ապրիլի 18-ի առավոտյան: Վերջին տվյալներով' ողբերգության զոհերի թիվը հասել Է 28-ի, 271 ուղեւոր համարվում Է անհայտ կորած: Փրկվել Է 179 մարդ, հաղորդել Է ՌԻԱ Նովոստի գործակալությունը:
