«Ազգային համաձայնություն» կուսակցության նախագահ, ՀՀ նախագահի թեկնածու Արամ Հարությունյանի կարծիքով Հայաստանի առաջին խնդիրը գործող վարչախմբից ազատվելն է, այդ պատճառով նա ընդդիմադիր բոլոր թեկնածուներին առաջարկում է քարոզարշավից 10 օր առաջ հանել իրենց թեկնածությունը և գործող նախագահ, նախագահի թեկնածու Սերժ Սարգսյանին թողնել մենակ առաջիկա նախագահական մրցապայքարում:
«Առաջարկում եմ գրանցվենք, բայց քարոզարշավից 10 օր առաջ բոլորս հանենք մեր թեկնածությունը, թողնելով Սերժ Սարգսյանին մենակ: Տեսնենք նա ինչքան ձայն կստանա։ Համոզված եմ, որ 50% էլ չի ստանա»,– այսօր լրագրողների հետ հանդիպմանն ասաց նա։
«Ինչի՞ համար նրան պետք է ընտրեն»,- հարցադրում արեց թեկնածուն և ավելացրեց, որ միայն այդ քայլով հնարավոր կլինի իշխանությունների իրական պատկերը տեսնել։
«Եթե թողնում ենք միայնակ, հասկանում ենք վիճակը։ Գոնե այդ ժամանակ չի կեղծի»,-ասաց նա։
Ըստ «Ազգային համաձայնություն» կուսակցության նախագահի՝ Հայաստանի Հանրապետական կուսակցությունն արդեն սկսել է իր շտաբներում ընտրակաշառք բաժանել, բայց, ըստ նրա, այս անգամ այդ գումարը տեղ չի հասնելու:
Արամ Հարությունյանի համոզմամբ՝ այս ընտրություններն այնքանով են տարբերվում մյուս ընտրություններից, որ կեղծ ընտրողներ ու թեկնածուներ չկան։
Նա հիշեցրեց նախկին ընդդիմադիր թեկնածուներին և հարցրեց, թե այսօր նրանք որտեղ են։ «Այնքան անսկզբունքային մարդիկ կան, որ ՀՀԿ-ի պադվալներում են մնում: Անունները չտամ, բոլորդ էլ լավ գիտեք»,- ասաց նա։
Երբ լրագրողները պնդեցին, որ, այդուհանդերձ, տա այդ մարդկանց անունները, Արամ Հարությունյանն առանց երկմտելու նշեց. «Ովքե՞ր են ՀՀԿ-ի ցուցակով անցել նախագահի թեկնածուներից, ո՞ւր է Վազգեն Մանուկյանը, (Արտաշես – Tert.am) Գեղամյանը»:
Արամ Հարությունյանի գնահատմամբ՝ իրավիճակն այսօր իրոք ողբերգական է. «Նույնիսկ պատերազմի ժամանակ նման բան չի եղել, որովհետև այն ժամանակ հույս կար: Հիմա հույս չկա, բայց տղերքը երկիրը կառավարում են և դեռ ուզում են հարստանալ։ Թիվ մեկ խնդիրը այս իշխանությունից ազատվելն է, որովհետև ամենակոռումպացվածն է, ոչ մի ժամանակ այսքան կոռումպացված իշխանություն չենք ունեցել»։
Քաղաքական բոլոր այն ուժերին, ովքեր ձեռքերը լվացել են այս նախագահական ընտրություններից, նախագահի թեկնածուն կոչ է անում սթափվել և մտածել, թե արժե՞ քաղաքացուն մենակ թողնել։
«Եվ ՀԱԿ-ը և ԲՀԿ-ն և ՀՅԴ-ն այս երկրի առաջ պատասխանատվություն ունեն։ Ես պատրաստ եմ, որ հանդիպենք, կոնսուլտացիաներ անենք: Քաղաքացուն չպետք է մենակ թողնենք, պետք է հավաքվենք, քննարկենք, առանց այդ էլ երկրի վիճակը վատ է»,- ասաց նա։
Արամ Հարությունյանը նաև ասաց, որ նախորդ ընտրություններից եզրակացություն անել և չմասնակցել այս ընտրություններին ինքը պարզապես չէր կարող։ «Եթե համարենք, որ միայն ես եմ ինձ ձայն տալու, կարևորը՝ ես գիտեմ, որ ես իրավացի եմ: Իմ համար թվաբանությունը կարևոր չի»,- ասաց նա:
Ինչ վերաբերում է ընտրագրավի մասին խոսակցություններին, թե որտեղից է նա հայթայթել այդ գումարը, Արամ Հարությունյանն ասաց, որ դա իր համար վիրավորական է։ «Սա նույն բանն է, որ ասես գնում եմ կռվի, բայց զենք չունեմ։ Ինչի՞, բացի Սերժ Սարգսյանից մնացածի համար պետք է խնդի՞ր լիներ»,- հարցրեց նա:
Եթե նախորդ նախագահական ընտրություններին Արամ Հարությունյանը հայտարարել էր, որ չկա մի թեկնածու, որի կողքը ինքը պատրաստ է կանգնել, այս ընտրություններին ևս, ըստ նրա, դեռևս չկա այդպիսին, բայց կսատարի արդեն երկրորդ փուլում միայն Սերժ Սարգսյանի դեմ դուրս եկած ցանկացած թեկնածուի։
«Հիմնական մրցակիցը, որ կուզեմ, որ ձայն չստանա, դա Սերժ Սարգսյանն է: Ընտրարշավից կերևա, ով ինչի համար էր առաջադրվել»,- հավելեց նա։
