Ն.Ս.Օ.Տ.Տ. Արամ Ա Կաթողիկոսն առաջնորդ սրբազանների, թեմի թեմական ու պատգամավորական ժողովի ներկայացուցիչների ընկերակցությամբ այցելել է Նոր Ջուղայի ազգային կրթահամալիր: Այս մասին «Արմենպրես»-ը տեղեկացավ Կիլիկիո կաթողիկոսության պաշտոնական կայքից:
«Հայ դպրոցն իր հայակերտումի առաքելությամբ միշտ կմնա մեր ինքնության ու հզորության առանցքը»,- շեշտել է Վեհափառ Հայրապետն՝ իր խոսքն ուղղելով Նոր Ջուղայի ազգային միացյալ վարժարանների աշակերտներին: Շուրջ մեկ ժամ հայկական վարժարանների աշակերտներն իրենց երգով ու ասմունքով խանդավառ մթնոլորտ են ստեղծել դպրոցում՝ ի հարգանս Նորին Սրբության: Այնուհետև իրենց խոսքն են ասել ուսումնական խորհրդի ատենապետն ու Սրբազան առաջնորդը:
Իր օրհնության խոսքում Վեհափառը հիշեցրել է հայ դպրոցի վիճակված առաքելությունը հատկապես Սփյուռքի ապահայեցնող պայմաններում՝ նշելով. «Հայ դպրոցի ճամփով մենք ոչ միայն գիտելիք ենք հավաքում, այլ նաև բացահայտում մեր արժեքները, ավանդույքներն ու ձգտումները: Հայ աշակերտը հայորեն է կազմավորովում: Ահա թե ինչու դաստիարակիչ դեր ունի հայ դպրոցը: Այս նախանձախնդրությամբ մենք պետք է մոտենենք հայ դպրոցին՝ աշակերտ, ծնողներ, ուսուցիչ կամ հոգաբարձու: Սփյուռքի դժվար պայմաններում, ջարդերից հետո հայ դպրոցը դարձել է մեր գոյության ամրոցը: Հետևաբար, ամեն զոհողություն պետք է կատարել հայ դպրոցը պահելու համար»:
Նորին Սրբությունը իր գնահատանքը հայտնել է տնօրինությանը, ուսուցիչներին ու կրթական մարմնին' հայ դպրոցում իրենց կատարած անխոնջ աշխատանքների համար: Ապա Վեհափառ Հայրապետն իրեն ուղեկոցողների հետ այցելել է Սուրբ Ամենափրկիչ վանք, որտեղ տեղի է ունեցել վանքի վերանորոգված ու վերադասավորված մատենադարանի բացումը:
