ԵԱՀԿ-ի երկրների ԱԳ նախարարները չեն կարողացել համաձայնեցնել Ուկրաինայի իրադրությանը վերաբերող ամփոփիչ փաստաթուղթը: Այդ մասին, ինչպես տեղեկացնում է «Արմենպրես»-ը, հայտնել է այդ կազմակերպությունում նախագահող Շվեյցարիայի արտաքին գործերի նախարար Դիդյե Բուրկհալտերը՝ ամփոփելով ԵԱՀԿ-ի ԱԳ նախարարների խորհրդի նիստի առաջին օրվա արդյունքները:
«Մեզ չհաջողվեց 57 երկրների կոնսենսուսի հասնել Ուկրաինայի ճգնաժամի վերաբերյալ հռչակագրի նախագծի հետ կապված բոլոր հարցերի շուրջ: Քննարկումը ցույց տվեց, որ կան ճգնաժամային իրադրության պատճառների տարբեր գնահատականներ»,- հայտարարել է նա:
Բուրկհալտերի խոսքով՝ ԵԱՀԿ-ի երկրների շատ ներկայացուցիչներ ընդսմին ընդգծել են այն բանի անհրաժեշտությունը, որ հակամարտության բոլոր կողմերը իրադրության կարգավորման համար պետք է կատարեն Մինսկի հռչակագիրը, հաղորդել է ՌԻԱ Նովոստին:
