ՀՀ վարչապետ Հովիկ Աբրահամյանն ընդունել է Հայաստանի Հանրապետությունում Եվրոպայի խորհրդի (ԵԽ) գրասենյակի ղեկավար Օլեքսանդր Պավլյուկին, ով ավարտում է իր առաքելությունը մեր երկրում:
Ինչպես «Արմենպրես»-ին տեղեկացրին ՀՀ կառավարության տեղեկատվության և հասարակայնության հետ կապերի վարչությունից, վարչապետը շնորհակալություն է հայտնել ՀՀ-ում ԵԽ գրասենյակի ղեկավարին կատարած աշխատանքի համար' բարձր գնահատելով նրա անձնական ներդրումը ՀՀ-ԵԽ գործակցության խորացման գործում և հաջողություն մաղթել հետագա գործունեության մեջ:
Իր հերթին Օլեքսանդր Պավլյուկը շնորհակալություն է հայտնել կառավարության ղեկավարին արդյունավետ համագործակցության համար՝ նշելով, որ կշարունակի մնալ Հայաստանի բարեկամն ու սիրով կպահպանի կապերը մեր երկրի և ժողովրդի հետ:
Զրուցակիցները գոհունակություն են հայտնել ՀՀ-ԵԽ համագործակցության ընթացքից և, մասնավորապես, 2012-2014թթ. Գործողությունների ծրագրի արդյունքներից: Երկուստեք ընդգծվել է, որ Գործողությունների ծրագրով նախատեսված ծրագրերը հաջող իրականացվել են, և բարեփոխումների արդյունքում Հայաստանը որպես ԵԽ անդամ երկիր էական առաջընթաց է արձանագրել ժողովրդավարության և մարդու իրավունքների պաշտպանության ոլորտում:
Կողմերը բարձր են գնահատել նաև 2013 թ. մայիս-նոյեմբերին ԵԽ նախարարների կոմիտեում Հայաստանի նախագահության արդյունքները, ինչը հնարավորություն տվեց զ արգացնել երկկողմ համագործակցությունը և ակտիվացնել երկխոսությունը ԵԽ անդամ երկրների հետ:
Անդրադառնալով համագործակցության առաջնահերթություններին և հեռանկարներին՝ Հովիկ Աբրահամյանը և Օլեքսանդր Պավլյուկը մտքեր են փոխանակել նաև ՀՀ-ԵԽ 2015-2017թթ. Գործողությունների ծրագրի վերաբերյալ, որը ներկայում քննարկման փուլում է և հնարավորություն կտա շարունակել ընթացիկ բարեփոխումները:
