ՀՀ պաշտպանության նախարար Սեյրան Օհանյանի փոխանցմամբ, Հայկական զինված ուժերն ապացուցել են, որ հանդիսանում են կայացած եւ անընդհատ զարգացող կառույց, հետեւաբար ի զորու են իրենց առջեւ դրված խնդիրն ինքնուրույն լուծել:
«Հատկապես այս վերջին տարիներին Հայկական զինուժն ապացուցել է, որ կայացած կառույց է, եւ լարվածության այս փոքր ձեւերը չեն կարող մեզ ստիպել, որ դիմենք ՀԱՊԿ-ին: Ինչի՞ համար է Հայկական բանակը, որ իր առջեւ դրված խնդիրներն այս փոքր սրացումների դեպքում չկարողանա կատարել: Հակառակորդի քանակական առավելությունը մեր վրա չի ազդում:
Որակական առումով եւ մարտական ոգով ավելի բարձր հիմքերի վրա ենք եւ մեր առջեւ դրված խնդիրները կարողանում ենք իրականացնել»,- հունվարի 27-ին ՀՀ ՊՆ վարչական համալիրում կայացած ասուլիսի ժամանակ ասաց Սեյրան Օհանյանը' հավելելով, որ գոյություն ունի նաեւ ՀԱՊԿ-ին դիմելու ընթացակարգ, համաձայն որի սահմանային լարվածության ժամանակ խնդիրները պետք է քննարկվեն կառավարությունում, Ազգային անվտանգության խորհրդում եւ քննարկումների արդյունքում Անվտանգության խորհուրդը պետք է որոշում կայացնի' դիմել, թե չդիմել ՀԱՊԿ-ին' գործող իրավական նորմերի շրջանակում:
