Լոզանում ավարտվել է Իրանի միջուկային ծրագրի շուրջ «վեցնյակի» լիագումար հանդիպումը: ՏԱՍՍ-ի փոխանցմամբ՝ կողմերը քննարկել են ապագա քաղաքական համաձայնության հնարավոր ձևակերպումները:
Ավելի վաղ Լոզանում տեղի է ունեցել «վեցնյակի» կոորդինացիոն հանդիպումը: Հանդիպումներն անցկացվել են նախարարների մակարդակով: Ռուսաստանը Սերգեյ Լավրովի բացակայության ժամանակ ներկայացրել է Ռուսաստանի փոխարտգործնախարար Սերգեյ Ռյաբկովը:
Ինչպես ավելի վաղ հայտնել է գործակալության աղբյուրը, Լոզանում Իրանի շուրջ գիշերային երկկողմ խորհրդակցություններն առաջընթացի չեն հանգեցրել: Առանցքային խնդիր է մնում պատժամիջոցների թեման:
«Չի հաջողվել առաջընթաց ձեռք բերել: Հիմնական չլուծված խնդիրը պատժամիջոցները չեղարկելու հարցն է»,- ասել է նա:
Ռուսաստանի արտաքին գործերի նախարար Սերգեյ Լավրովը երկուշաբթի վերադարձել է Մոսկվա, Լոզան կրկին վերադառնալու մտադրությամբ, այն դեպքում, եթե բանակցություններին առաջխաղացում նկատվի:
