Վերջին երկու շաբաթվա ընթացքում Հնդկաստանում մահացել է ավելի քան 220 մարդ. 256 շրջաններում 330 միլիոնից ավելի մարդ խմելու ջրի սուր պակասություն է զգում: Դա կազմում է երկրի բնակչության մեկ քառորդը: «Արմենպրես»-ի տեղեկացմամբ՝ այդ մասին գրել է ՏԱՍՍ-ը՝ հղում տալով Հնդկաստանի Առողջապահության նախարարությանը:
Երկրի հարավային նահանգներում՝ Օդիշյեյում, Թելանհանում և Անդհրա Պրադեշում իրավիճակն ամենից շատ է սրված՝ այնտեղ շոգից 220-ից ավելի մահացածներ կան: Օդիշյեում վերջին հինգ օրերի ընթացքում ջերմաստիճանը շարունակաբար աճել է և շաբաթ օրը հասել ռեկորդայինի՝ 47,5 աստիճանի ըստ Ցելսիուսի: Անտանելի շոգը տիրում է գրեթե ողջ Հնդկաստանում:
Հնդկաստանի առողջապահության նախարարությունը հայտնում է, որ 2016 թ. ամառը կարող է վերջին 100 տարում ամենաշոգը դառնալ. երկրի հարավում ջերմաստիճանը կարող է գերազանցել 48 աստիճանն ըստ Ցելսիուսի:
Իրավիճակը վատթարացրել է վերջին երկու տարվա մեջ մուսոնային տեղումների կրիտիկական ցածր քանակով պայմանավորված: Նախորդ տարվա դժբախտությունից խուսափելու համար կառավարությունը երկրի ամենաշոգ շրջաններում հայտարարել է արտակարգ իրավիճակ: 2015 թ. անոմալ շոգից մահացել էր 2 հազար մարդ:
Բնակիչներին խորհուրդ են տալիս առանց ծայրահեղ անհրաժեշտության դուրս չգալ տնից ժամը 11:00-13:00-ի սահմաններում: Նաև տեղակայվել են անվճար խմելու ջրի և կաթնային շիճուկի տրամադրման կետեր:
Մասնագետները աննախադեպ շոգը պայմանավորում են ապրիլյան անոմալ տապով և Էլ Նինյոյի ուժեղացմամբ: Դա բնության մեջ ցիկլիկ բնույթ կրող երևույթ է, որը կրկնվում է 2-7 ընդմիջմամբ: Էլ Նինյոն սովորաբար ուղեկցվում է էկոլոգիական աղետներով՝ երաշտ, հրդեհներ, հորդառատ անձրևներ, ինչը հանգեցնում է մարդկային կորուստների և անասնաբուծության ու մշակաբույսերի ոչնչացման:
