Վիրահայոց թեմի «Հայարտուն» կենտրոնի «Գալուստ Գյուլբենկյան» սրահը հունիսի 11-ին վերածվել էր գույնզգույն ծաղիկներով հրաշալի պուրակի՝ որտեղ փարթամորեն ներկայացվել էին ՀՀ մշակույթի վաստակավոր գործիչ, պրոֆեսոր, գեղանկարիչ Սուսաննա Մկրտչյանի ռելիեֆային գեղանկարչության 35 նմուշներ: Նկարչուհին թբ իլիսահայ արվեստասեր հասարակայնությանն էր ներկայացել բարելեֆ աշխատանքներով, հիմնականում «Ծաղիկներ» նկարաշարով:

Կակաչներ, անմոռուկներ, քրիզանթեմներ, երիցուկներ, նատյուրմորտներ, որ դառնալով արվեստագետ նկարչուհու հոգու լույսը, սրտի ջերմությունն ու աշխարհը գեղեցկացնելու նրա անսահման ցանկությունը, ցուցանմուշներից փոխանցվում էր արվեստասեր հանդիսատեսին: Իսկ այդ հանդիսատեսը թբիլիսահայ մտավորականությունն էր. նկարիչներ ու արվեստի գործիչներ, գեղանկարչությունը սիրողներ և գնահատողներ, որ մեծ հետաքրքրությամբ ծանոթանում էին ճանաչված ստեղծագործողի աշխատանքներին:

Ինչպես «Արմենպրես»-ին տեղեկացրին «Հայարտուն» կենտրոնից, Վրաստանի հայ նկարիչների միության նախագահ Մերուժան Շահումյանը, բացելով ցուցահանդեսը և ներկայացնելով տաղանդաշատ նկարչուհուն, արժևորեց նրա ստեղծագործական լայնահուն ներկապնակը և գեղեցիկը ստեղծելու բնական տաղանդը:

Հաղորդագրության մեջ նաև նշված է. «Բազմաոճ է Սուսաննա Մկրտչյանի ստեղծագործությունը: Նա կարող է միաժամանակ աշխատել տարբեր ուղղություններով. գեղանկարչություն, գրաֆիկա, նկար մետաքսի վրա, թղթից կոլաժներ և այլն: Անդրադարձ կատարելով ցուցադրված աշխատանքներին, նրա երևակայական աշխարհի, տեսանելին գեղարվեստական մեծ վարպետությամբ արտահայտելու տաղանդի մասին իրենց մտքերն արտահայտեցին նկարիչ-խեցեգործ Լևոն Օսիպովը, նկարչուհի Իրեն Օհանջանովան, հանդիսատես Սուսաննա Խաչատրյանը:

Աշխարհի 36 երկրներում ցուցադրված շնորհաշատ նկարչուհի Սուսաննա Մկրտչյանի սրտի մեծ փափագն էր իր ստեղծագործական աշխարհից մի փոքր մասնիկ ներկայացնել նաև Վրաստանի իր հայրենակիցներին: Մեծ պատասխանատվությամբ և առանձնահատուկ սիրով կազմակերպված ցուցահանդեսին նկարչուհին ներկայացել էր ընտանիքի անդամներով, հույս հայտնելով առաջիկայում կրկին հանդիպելու Թբիլիսիի արվեստասեր հասարակայնության հետ: Տիկին Սուսաննան երախտագիտության խոսքեր ուղղեց Վիրահայոց թեմի առաջնորդին, «Հայարտուն» կրթա-մշակութային և երիտասարդության կենտրոնին' ընդունե լության համար և կենտրոնի ղեկավար Լևոն Չիդիլյանին նվիրեց Հենրիկ Իգիթյանի հեղիմակությամբ «Ջաջուռեցի Մինասը» ալբոմը:

Ցուցահանդեսը օրհնության և գնահատանքի խոսքով ամփոփեց Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը: Սրբազան Հայրը կարևորեց մշակութային այն մտածելակերպը, որն այնքան անհրաժեշտ է երկրի, քաղաքի, շրջանի զարգացման համար և գնահատանքի խոսքեր ուղղեց շնորհաշատ ստեղծագործողին նրա բարձրարվեստ գործերի, նաև կազմակերպչական այն մեծ ունակության համար, որի շնորհիվ հիմնադրվել և գործում է Գյումրու գեղագիտության կենտրոնը, դառնալով բազում սերունդների գեղագիտական կրթության մի օջախ:

Սուսաննա Մկրտչյանի ցուցանմուշները քանդակի ու գեղանկարչության յուրօրինակ սինթեզ լինելով, նաև անսխալ կատարված սկզբունքորեն բարդ և աշխատատար մի գործընթացի հրաշալի կտավներ են»։