Ռուսաստանը կարող է օգնել Հայաստանին կովկասյան հովազների վերաբնակեցման կենտրոն ստեղծելու հարցում: Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի» գործակալությունը, այս մասին հայտարարել է ՌԴ բնական պաշարների և բնապահպանության նախարար Սերգեյ Դոնսկին:
«Մեզ են դիմել այն գործընկեր երկրներից, որոնք գտնվում են հովազների միգրացիայի ճանապարհին: Այդ երկրների միջանցիկ գոտիներում կան տարածքներ, որտեղ հովազներ են հայտնվում: Հայաստանցի գործընկերները դիմել են մեզ, որպեսզի օգնենք իրենց վերաբնակեցման կենտրոն ստեղծելու հարցում: Սկզբունքորեն, մենք կարող ենք կիսվել մեր փորձով՝ հաշվի առնելով այն հանգամանքը, որ մենք շահագրգռված ենք այդ տարածքները վերաբնակեցնելու հարցում»,- նշել է նախարարը՝ հավելելով, որ ՌԴ-ն կարող է Հայաստանին փոխանցել Մերձավոր Արևելքի այն հովազներից, որոնք ներկայում գտնվում են Սոչիի վերաբնակեցման կենտրոնում:
