Միացյալ Թագավորությունն ու ՆԱՏՕ-ն պետք է ունենան բավականաչափ ռազմական պոտենցիալ, որպեսզի անհրաժեշտության դեպքում զսպեն Ռուսաստանի կողմից եկող ագրեսիան: Այդ մասին հայտնում է BBC-ն`Բրիտանիայի խորհրդարանի պաշտպանության կոմիտեի կողմից հրապարակված զեկույցին՝ հղումով:
Ինչպես նշվում է 58-էջանոց փաստաթղթում, Ղրիմի բռնակցումն ու Ռուսաստանի զինված ներխուժումը արևելյան Ուկրաինայի տարածք դարձել են լրջագույն սպառնալիք Եվրոպայում կայունության համար:
Փորձագետները նշում են, որ վերջին շրջանում Մոսկվան մեկ անգամ չէ, որ ցուցաբերել է վտանգավոր վարքագիծ Բրիտանիայի և ՆԱՏՕ-ի նկատմամբ: Մասնավորապես, ռուսական ռազմական ինքնաթիռները պարբերաբար վտանգավոր կերպով մոտեցել են դաշինքի երկրների օդային տիրույթին:
Բրիտանացի ռազմական փորձագետների տվյալներով՝ Ռուսաստանը ի վիճակի է 48 ժամում մոբիլիզացնել մինչև 13 հազար զինծառայողի, իսկ երկու օրում՝ ևս 30 հազարի:
Զեկույցում նշվում է, որ ԵՄ-ի և ԱՄՆ-ի պատժամիջոցները Ռուսաստանի դեմ, թեև թուլացրել են ռուսական տնտեսությունը, սակայն չեն կարողացել զսպել Մոսկվայի ռազմական պլանները:
Փորձագետները նաև ընդգծում են, որ Ռուսաստանը շարունակում է ռազմական և քաղաքական միջամտությունը սիրիական հակամարտությանը և մտադիր չէ դադարեցնել Սիրիայի նախագահ Բաշար Ասադին ցուցաբերվող աջակցությունը:
«Այսօր Ռուսաստանի և Բրիտանիայի միջև երկխոսությունը շատ է դժվարացել: Մեր տվյալով՝ երկու երկրի միջև հարաբերությունները հասել են ամենացածր կետին»,- ասվում է փաստաթղթում:
Միաժամանակ, փորձագետները նշում են, որ նման իրավիճակը պետք է փոխվի, և որ Լոնդոնին անհրաժեշտ է ցուցաբերել ցանկություն՝ կառուցողական երկխոսություն հաստատել Մոսկվայի հետ:
Մայիսին Բրիտանիայի պաշտպանության նախարար Մայլք Ֆելոնը խորհրդարանական լսումների ժամանակ հայտարարեց, որ ի պատասխան Ռուսաստանի սպառնալիքների, ՆԱՏՕ-ն այս տարի կսկսի ձևավորել այսպես կոչված «Բարձր պատրաստակամության միացյալ ուժերը» (Very High Readiness Joint Task Force):
