Վիկտոր Սողոմոնյանն արձագանքել է մամուլում վերջերս հայտնված այն տեղեկություններին, համաձայն որոնց՝ Ռոբերտ Քոչարյանն, իբր, բնակություն է հաստատել ԱՄՆ-ում: Հայտնել է նաև, թե երբ կհրապարակվի նախագահ Քոչարյանի խոստացված հարցազրույցը՝ ներքաղաքական զարգացումների վերաբերյալ:
Ըստ Վիկտոր Սողոմոնյանի՝ Ռոբերտ Քոչարյանը շարունակում է բնակվել Երևանում և բնակավայրը փոխելու մտադրություն չունի: «ԱՄՆ վերջին անգամ այցելել է 2014 թվականին, մի քանի օրով: Մեկ տողով ասեմ նաև այսպես կոչված «գաղտնի» հանդիպումների մասին, ավելի ճիշտ՝ կրկնեմ. երկրորդ նախագահը ում հետ և երբ ցանկանում է՝ հանդիպում է Հայաստանում, ու գաղտնի ձևաչափերի կարիք չունի»:
Ինչ վերաբերում է խոստացված հարցազրույցին, որում երկրորդ նախագահը պետք է հանրությանը ներկայացնի իր գնահատականները առկա իրավիճակի վերաբերյալ, Վիկտոր Սողոմոնյանը նշում է, որ ուշացումը մի քանի պատճառ ունի. «քաղաքական գործընթացների տրամաբանությունը որոշակիորեն խաթարված է, դեռևս չի ձևավորվել պայքարի պատրաստվող քաղաքական ուժերի վերջնական դասավորվածությունը, առայժմ անորոշ են մնում ապագա ընտրապայքարի բազմաթիվ կարևոր գործոններ: Այդպիսով, ներքաղաքական իրավիճակը վերլուծելու միակ ձևը բազմակի ենթադրություններ անելն է, ինչը նախագահ Քոչարյանի ոճը չէ»:
