Րաֆֆի Հովհաննիսյանը խոսում է Հայաստանում նոր իշխանության ձեւավորման մասին, եւ երկրի քաղաքացիներն աջակցում են նրան: Խոսք է գնում արդեն նոր կառավարության կազմի հրապարակման մասին, սակայն ակնհայտ է, որ իշխանության ձեւավորումը պետք է սկսել պատասխանատվությունից:
Մարտի 1-ին հրապարակ՝ քաղաքացիների դատին պետք է հրավիրվի գլխավոր դատախազ Աղվան Հովսեփյանը, ով պարտավոր է ժողովրդի առաջ պատասխան տալ, թե ինչու 5 տարիների ընթացքում չի հաջողվել ավարտել մարտի 1-ի գործով հետաքննությունը: Ժողովուրդն իրավունք ունի պատասխանի համար կանչել գլխավոր դատախազությանը, որին գումար է վճարում, որպեսզի նա բացահայտի հանցագործությունները:
Ժողովուրդը պետք է հրավիրի նաեւ ԿԸՀ նախագահին, որպեսզի հաշվետվութուն տան ընտրությունների վերաբերյալ: Թող նրանք գան ու ասեն ժողովրդին, որ ընտրություններն արդար ու ազնիվ են եղել: Թող դատախազն ասի, թե նախընտրական խախտումների թիվը որքան պետք է լինի, որպեսզի դրանք «չազդեն ընտրությունների արդյունքների վրա»:
Ժողովուրդը պետք է հարցնի գլխավոր դատախազին, թե այդ ինչ պայքար է տարվում կոռուպցիայի դեմ, եթե վերջին տարվա ընթացքում կոռուպցիայի համար պատասխանատվության կանչված անձանց թիվը նվազել է, իսկ կոռուպցիայի ցուցանիշներն աճել են:
Ժողովուրդը պետք է հրապարակ հրավիրի էկոնոմիկայի նախարարին, որպեսզի հարցնի, թե ինչպես են մշակել տնտեսական քաղաքականությունը, որ վերջին տարիներին աճել է մենաշնորհների եւ նվազել մանր ու միջին ձեռնարկությունների թիվը:
Ժամանակն է հրապարակ կանչել պատասխանատու անձանց: Թող գան ու պատասխան տա ժողովրդին: Իսկ եթե չգան, նշանակում է պետք է նրանց հեռացնել: Ոչ ոք երկրորդ անգամ չի գնում վատ կոշկակարի մոտ, որը փչացրել է կոշիկը:
