Թուրքիայի նախագահ Ռեջեփ Թայիփ Էրդողանը այսօր պաշտոնական այցով մեկնել է ԱՄՆ, որտեղ մայիսի 16-ին պետք է հանդիպում ունենա նախագահ Դոնալդ Թրամփի հետ: Թուրքական իշխանամետ «Yeni Şafak» թերթի կայքի տեղեկացմամբ՝ Էրդողանը անձնական ինքնաթիռով ԱՄՆ է ուղևորվել Պեկինից՝ Չինաստանում ավարտված այցից հետո:

Այցի ընթացքում Թուրքիայի նախագահին կուղեկցեն առաջին տիկին Էմինե Էրդողանը, Թուրքիայի արդարադատության նախարար Բեքիր Բոզդաղը, արտգործնախարար Մևլութ Չավուշօղլուն, Էկոնոմիկայի նախարար Նիհաթ Զեյբեքչին, Էներգետիկայի և բնական ռեսուրսների նախարար Բերաթ Ալբայրաքը և ազգային անվտանգության նախարար Ֆիքրի Ըշըքը:

Թրմափի հետ կայանալիք հանդիումից առաջ ԱՄՆ-ի թուրքական համայնքն ու հասարակական կազմակերպությունները Սպիտակ տան Լաֆայեթի այգում պատրաստվում են դիմավորել Էրդողանին: Աղբյուրի համաձայն՝ մայիսի 16-ին կայանալիք հանդիպման ընթացքում ԱՄՆ-ի հայ համայնքը պատրաստվում է ցույց անցկացնել Լաֆայեթի այգում՝ ընդդեմ Էրդողանի այցի:

Թուրքական թերթի պնդմամբ՝ հակաէրդողանական քայլեր են նախաձեռնում նաև ԱՄՆ-ում բնակվող և Թուրքիայում ահաբեկչական խմբավորման պարագլուխ համարվող Ֆեթհուլլահ Գյուլենի կողմնակիցները: Տեղի ոստիկանությունն էլ աշխատանքներ է տանում՝ մարդաշատ վայրերում անվտանգության խստացված ռեժիմ սահմանելու և հակադիր խմբերի հնարավոր բախումները կանխելու համար:

Հիշեցնենք, որ մայիսի 16-ին նախատեսված է Թրամփի և Էրդողանի երկկողմ հանդիպումը Սպիտակ Տանը: Այնուհետև տեղի կունենան նաև պատվիրակությունների մակարդակով հանդիպումներ: Հնադիպման օրակարգում կլինեն ԱՄՆ-ի կողմից Սիրիայի քրդական ուժերին զինամթերքի տրամադրման հարցը, Սիրիայի, Իրաքի հիմնախնդիրները և այլ արդի թեմաներ:

Ermenihaber