Երևանի ավագանու «Ելք» խմբակցությունը կմասնակցի նորընտիր քաղաքապետ Տարոն Մարգարյանի երդմնակալության արարողությանը: Հունիսի 12-ին Երևանի քաղաքապետարանում լրագրողների հետ զրույցում այդ մասին ասաց Երևանի ավագանու «Ելք» խմբակցության անդամ Անահիտ Բախշյանը:
«Մենք եկել ենք աշխատանքի, սա մեր աշխատանքի մի մասն է: Երևանցիները մեզ ընտրել են, և կարծում եմ՝ այնքան էլ կարևոր չէ՝ կմասնակցենք երդմնակալությանը, թե ոչ: Չեմ կարծում, որ մասնակցելով կամ չմասնակցելով Երևանի համար կարևոր խնդիր ենք լուծում»,- ասաց Բախշյանը:
Գնահատելով անցած տարիներին Երևանի քաղաքապետ Տարոն Մարգարյանի աշխատանքը՝ Բախշյանն ընդգծեց, որ իր բարձրացրած խնդիրների 30 տոկոսը լուծվել է և հույս հայտնեց, որ այս անգամ թե իրեն, թե Տարոն Մարգարյանին կհաջողվի ավելի շատ գործ անել Երևանի զարգացման համար:
Ավագանու «Երկիր Ծիրանի» խմբակցությունը, սակայն, չի մասնակցի հատուկ նիստին, որի ժամանակ Մարգարյանը պետք է երդվի: Կուսակցության ղեկավար Զարուհի Փոստանջյանը տեղեկացրեց, որ խմբակցությունը նույն ժամին հրավիրել է նիստ՝ օրակարգում ունենալով ԱՄՆ 28-րդ նախագահ եւ Խաղաղության Նոբելյան մրցանակի դափնեկիր Թոմաս Վուդրո Վիլսոնի արձանի տեղադրման նախաձեռնություն իրականացնելու հարցը:
