Ինչպես արդեն տեղեկացրել ենք, այսօր Կենտրոն և Նոր Նորք վարչական շրջանների ընդհանուր իրավասության դատարանում մեկնարկեց «Իգլա»-ի գործով դատական նիստը, որի ժամանակ Սամվել Բաբայանի պաշտպան Ավետիս Քալաշյանը միջնորդություններ ներկայացրեց դատարանին:
Առաջին միջնորդությամբ՝ պաշտպանը հայտնեց, որ սեփականության վրա կալանք դնելն իրավաչափ չէ և խախտում է Բաբայանի սեփականության իրավունքը:
Սամվել Բաբայանի պաշտպանը նաև միջնորդեց իր պաշտպանյալի տեսակցությունների և հեռախոսային խոսակցությունների վրա դրված արգելանքը վերացնել:
Իսկ երրորդ միջնորդությամբ պաշտպանը հայտնեց. «Միջնորդում եմ խափանման միջոց կալանավորումը վերացնել և կիրառել ստորագրություն չհեռանալու մասին, կամ կիրառել գրավ»,-ասաց Քալաշյանը:
Դատավոր Արշակ Վարդանյանը սակայն մերժեց Սամվել Բաբայանի գույքի վրա դրված կալանքը հանելու մասին և Սամվել Բաբայանի կալանավորումը վերացնելու մասին պաշտպանի միջնորդությունները՝ հիմնավորելով, որ ազատության մեջ Բաբայանը կարող է խոչընդոտել գործի ընթացքին։
Նիստը նախագահող դատավորը սակայն բավարարեց մեկ այլ միջնորդություն՝ թույլատրելով Սամվել Բաբայանի ընտանիքին անդամների և հարազատներին տեսակցություն՝ տալով նաև հեռախոսազանգի հնարավորություն:
