«Սպայկա» ընկերության հիմնադիր-տնօրեն Դավիթ Ղազարյանն ազատ է արձակվել: ԼՈՒՐԵՐ.com-ի հետ զրույցում Դավիթ Ղազարյանի փաստաբանական թիմի անդամ Կարեն Սարդարյանն ասաց, որ իրենց պաշտպանյալին դեռ չեն հանդիպել, քանի որ բնական է՝ ազատ արձակվելուց հետո առաջին հերթին գնացել է իր ընտանիքին տեսնելու: 

«Ինչպես նախկինում, հիմա ևս Դավիթ Ղազարյանն ասում է, որ պատրաստ է վճարել բոլոր հարկերը, միայն թե մենք ևս պետք է մասնակցենք հարկային ստուգումներին, փորձաքննություններին, քանի որ հարկատուի մասնակցությունն օրենքի պահանջ է: Երբ հարկատուն համոզվի, որ գումարը համապատասխանում է իրականությանը՝ կվճարի: Այսինքն՝ պարոն Ղազարյանը մշտապես ասել է, որ չի խուսափում վճարումներից, քանի որ գուցե եղել են հարկային խախտումներ, որոնք չեն բացառվում բիզնեսի պարագայում: Պարզապես պետք է հասկանալ՝ ստուգման արդյունքում ինչ մեխանիզմով է ձևավորվում գումարի թիվը»,- ասաց փաստաբանը:

Հարցին՝ ինչպե՞ս է ստացվում, որ ըստ ՊԵԿ-ի հաղորդագրության՝ «Սպայկա» ընկերությունը պետական բյուջե չի վճարել ընկերության ձեռնարկատիրական գործունեության արդյունքում առաջացած 7 միլիարդ դրամի մաքսատուրք և հարկ, սակայն փաստորեն ընկերության տնօրենն ազատ է արձակվել ընդամենը 1 միլիարդ դրամ վճարելով՝ փաստաբանն ասաց. «1 միլիարդ դրամը կանխավճար է, որպեսզի ցույց տանք, որ կազմակերպությունը չի խուսափում վճարումից, իսկ գումարի մյուս մասը վճարելը կախված է հարկային ստուգումների արդյունքում: Եթե համաձայնվենք գումարի թվի հետ՝ կվճարենք, եթե ոչ՝ կվիճարկենք»,- նշեց նա՝ ընդգծելով, որ հետագա անելիքները կախված են ստուգման արդյուքներից:

Կարեն Սարդարյանն այլ մանրամասներ հայտնելուց հրաժարվեց՝ նշելով, որ դրանց մասին կխոսեն առաջիկայում՝ մայիսի 6-ին տեղի ունենալիք մամուլի ասուլիսի ժամանակ: