Նյու Յորքում խուճապ է տիրում, կորոնավիրուսի պատճառով մարդիկ, մեծ հերթեր կանգնելով, գնում են ձեռքերի հականեխիչներ, մաքրող միջոցներ, ջուր և առաջին անհրաժեշտության իրեր, իսկ աշխարհում ամենամարդաշատ հրապարակներից մեկը՝ Times Square-ն, աչքի առաջ դատարկվում է, հաղորդում է «Ինտերֆաքսը»:

COVID-19 վիրուսի տարածման հանդեպ վախն ամերիկացիներին հարկադրել է ուտելիքի և ջրի պաշար տեսնել, գնել դիմակներ, ձեռքերի հականեխիչներ, զուգարանի թուղթ և դեղորայք:

«Շատ մարդիկ սկսում են անհանգստանալ, որ համաճարակի դեպքում առաջին անհրաժեշտության ապրանքները վաճառված կլինեն: Կորոնավիրուսի հանդեպ վախը յուրատեսակ խելացնորություն է առաջացրել մեծ խանութներում»,- գրում են լրատվամիջոցները:

Ամերիկացիներն ամեն օր սոցիալական ցանցերում զետեղում են ջրի և հականեխիչների դատարկ դարակների նկարներ խոշոր ցանցերի խանութներում, ներառյալ Costco-ն, Walmart-ը, Target-ը և Home Depot-ը և երկար հերթեր ինչպես խանութների ներսում, այնպես էլ դրսում:

Վերջին ժամանակներս ամերիկացիներից բազմաթիվ գանգատներ են ստացվում դիմակների և հականեխիչների բարձրացված գների համար, ըստ որում որոշ գնորդներ պատրաստ են ավելի շատ վճարել, որպեսզի գնեն առկա ապրանքները:

New York Post-ի տվյալներով՝ վիրուսից պաշտպանության ապրանքների առցանց-վաճառքները վերջին երկու ամսում բարձրացել են 817 տոկոսով: Նյու Յորքի նահանգապետ Էնդրյու Քուոմոյի հաղորդմամբ՝ նահանգում կորոնավիրուսով հիվանանալու դեպքերի թիվը հասել է 105-ի: Մարտի 7-ին Քուոմոն հայտարարել է նահանգում արտակարգ դրություն հաստատելու մասին: