Այսօր մամուլում տեղեկատվություն հայտնվեց, որ վարչապետ Փաշինյանի հանձնարարությամբ «Հայոց ցեղասպանության թանգարան-ինստիտուտ»-ի հաշվեկշռում գտնվող հողամասը որոշվել է փոխանցել Երևանի քաղաքապետարանին: Թեմայի շուրջ ԼՈՒՐԵՐ.com-ի թղթակիցը զրուցեց թանգարան-ինստիտուտի տնօրեն Հարություն Մարությանի հետ: «Հողատարածքը քաղաքապետարանին հանձնելու որոշում չկա,  բայց ունենք հանձնարարականը: Նախ պետք է լինի քննարկում, որից հետո պարզ կդառնա հետագա ընթացքը: Ճիշտ է, քննարկման համար նախանշված հստակ օր չկա, բայց չի բացառվում, որ այն տեղի ունենա եկող շաբաթ»,-ասաց նա: Մարությանի խոսքով՝ քննարկմանը մասնակցելու են թանգարան-ինստիտուտի հոգաբարձուների խորհրդի անդամները, նաև ԱԺ պատգամավորներ՝ Վլադիրմիր Վարդանյանը, Հովհաննես Հովհաննիսյանը: «Դեռևս 2004 թվականին թանգարան-ինստիտուտին հանձնել են 98-99 հեկտար հողատարածք, որը Ծիծեռնակաբերդի մեծագույն մասն է և գտնվում է մեր հաշվեկշռում: Նույնիսկ, եթե որոշվի հողատարածք տրամադրել քաղաքապետարանին, ապա պարզ չէ, թե որքան մասը դա կլինի, բայց ես չեմ կարծում, թե նման որոշում լինի»,-ընդգծեց նա: Տնօրենի հավաստմամբ՝ քաղաքապետարանը ուզում է տարածքը կանաչապատել, որը նաև իրենց ցանկությունն է, բայց կա մի փոքր նրբություն. «Մենք ուզում ենք, որ այդ տարածքը մնա մեր հաշվեկշռում և տարածքի կանաչապատումը լինի որոշակի ծրագրով: Մեր ծրագիրը հուշայգի հիմնելն է, որը պետք է ներառի Արևմտյան Հայաստանի և Օսմանյան կայսրության հայաբնակ վայրերի՝ գավառների, խոշոր բնակավայրերի, գյուղերի անուններով պուրակներ, ճեմուղիներ: Հնարավորության դեպքում, յուրաքանչյուր բնակավայրի հատվածում կլինեին տվյալ տարածքին բնորոշ  բույսերը:  Այսինքն ծրագիրն այնպիսին է, որ մարդիկ նաև ինֆորմացիա ստանան մեր պատմական բնակավայրերի մասին, սովորեն, այն, ինչը չգիտեն»: