Մարալիկի հիվանդանոցի տասը աշխատակից թեստավորման արդյունքում մեկուսացվել է, ինչպես նաև ամբողջ անձնակազմից՝ շուրջ 60 հոգուց, վերցրել են նմուշներ, որոնց պատասխանները դեռ հայտնի չեն: Այս մասին ԼՈՒՐԵՐ.com-ի թղթակցի հետ զրույցում ասաց Մարալիկի քաղաքապետ Արտակ Գևորգյանը: Նա լիահույս է, որ թեստերի արդյունքները մեծապես բացասական կլինեն: «Արդեն իսկ հաստատված հիվանդները Գյումրիի ինֆեկցիոն հիվանդանոցում են, իսկ նրանց ընտանիքի անդամները՝ Գյումրիի հյուրանոցներից մեկում»,-նշեց նա: Գևորգյանի հավաստմամբ՝ բնակչության շրջանում մտահոգությունն ավելացել է.«Քաղաքում պասիվություն է, բակերում գրեթե մարդիկ չկան, իսկ ովքեր դրսում են՝ դիմակներով ու ձեռնոցներով են»: Քաղաքապետն ընդգծեց, որ քաղաքում իրականցնում են ամենօրյա ախտահանիչ աշխատանքներ, իսկ վարակման աղբյուրը դեռ չի պարզվել. «Վարակման աղբյուրը դեռ չի պարզվել, դա բարդ աշխատանք է, բայց հույս ունենք, որ շուտով կպարզվի, քանի որ միայն այդ տարբերակով կարող ենք շղթան բացահայտել և կառավարել վիրուսի հետագա տարածումը»:
