Թուրքիայի նախագահ Ռեջեփ Թայիփ Էրդողանը ժամանակ չի գտել շփվելու հանրապետություն ժամանած ԱՄՆ պետքարտուղար Մայք Պոմպեոյի հետ:
«Եվ պետքարտուղարը, և Թուրքիայի պաշտոնատար անձինք, այդ թվում ՝ արտգործնախարար Չավուշօղլուն, և, կարծում եմ, նաև նախագահ Էրդողանը կցանկանային, որ այդ հանդիպումը կայանար: Արդյունքում, այն չկայացավ: Պատճառն այն էր, որ նախագահ Էրդողանի ժամանակացույցը փոխվեց, և կարողացանք պահպանել այն պարամետրերը, որոնք մենք դրել ենք պետքարտուղարի այցի հիմքում», - ասել է Պետդեպարտամենտի ներկայացուցիչը Ստամբուլում կայացած ճեպազրույցում: Նա ընդունել է Վաշինգտոնի և Անկարայի միջև տարաձայնությունների առկայությունը, բայց Պոմպեոյի հետ հանդիպում չկայանալու հանգամանքը բացատրել է Էրդողանի ժամանակացույցով։ «Չեմ կարծում, որ Թուրքիայի իշխանությունները իրենց օտարված են զգում: Ի վերջո, դա ժամանակացույցի խնդիր էր: Թուրքերը շատ լավ գիտեն մեր տեսակետները և այն, թե որտեղ են բախվում մեր և նրանց տեսակետները», - հավելել է դիվանագետը՝ պարզաբանելով, որ խոսքը տարածաշրջանում իրավիճակի տարբեր ընկալումների մասին է։