Չնայած ամեն ինչին՝ Իլհամ Ալիևը լավ մտադրություններ ցուցաբերեց՝ ձեռք մեկնելով Հայաստանին: Այս մասին Սոչիում հայտարարել է Թուրքիայի արտգործնախարար Մեվլութ Չավուշօղլուն իր ռուս գործընկեր Սերգեյ Լավրովի հետ բանակցություններից հետո: «Մենք, մեր հարգարժան նախագահը բազմիցս հայտարարել ենք, որ կայուն խաղաղության հաստատման դեպքում Թուրքիան և Ադրբեջանը կկարողանան կարգավորել հարաբերությունները Հայաստանի հետ», - ասել է Չավուշօղլուն:
Թուրքական դիվանագիտության ղեկավարը բարձր է գնահատել նաև Ռուսաստանի հետ երկխոսությունը միջազգային ասպարեզում հակասությունները վերացնելու հարցում: Ըստ նրա՝ Հարավային Կովկասում վերջին իրադարձությունները դրա վառ վկայությունն են: «Մենք կողմ ենք երկարաժամկետ խաղաղությանը և կայունությանը ԼՂ հարցում», - ասել է Չավուշօղլուն: «Մոտ ապագայում համատեղ մոնիթորինգի կենտրոնը կսկսի գործել։ Մենք պետք է վստահություն ստեղծենք, որպեսզի կարողանանք կայուն խաղաղություն հաստատել»,֊հավելել է նախարարը:
