Ուկրաինայի ընդդիմությունն ստորագրահավաք է սկսել՝ նախագահ Վլադիմիր Զելենսկիի իմփիչմենթի համար, Facebook-ի իր էջում հայտնել է Գերագույն ռադայի պատգամավոր Իլյա Կիվան:
«Պատմական պահ․ Զելենսկիի իմփիչմենթի համար պատգամավորները ստորագրահավաք են սկսել»,- գրել է պատգամավորը։
Գրառմանը կից լուսանկարում երևում է 9 ստորագրությամբ ձևաթուղթ։
Ստորագրահավաքի մասին որոշումը կուսակցության համագումարը կայացրել էր փետրվարի սկզբին։
Փետրվարի 2-ին Զելենսկին իր հրամանագրով գործողության մեջ է դրել ուկրաինական «112 Ուկրաինա», NewsOne և ZiK հեռուստաալիքների նկատմամբ՝ 5 տարի ժամկետով պատժամիջոցներ կիրառելու մասին ԱԱԽ որոշումը: Նրա հրամանագրից հետո ալիքները դադարեցրել են հեռարձակումը։ Հեռուստաալիքները երկրի ղեկավարին մեղադրել են «անցանկալի ԶԼՄ-ների նկատմամբ քաղաքական հաշվեհարդարի» մեջ:
Հետագայում ուկրաինական «Ընդդիմադիր հարթակ՝ հանուն կյանքի» կուսակցությունը հայտարարել էր նախագահ Վլադիմիր Զելենսկիի իմփիչմենթի գործընթացն սկսելու մասին։ Նախագահի գրասենյակի ղեկավար Անդրեյ Երմակը հայտարարել է, որ իմփիչմենթի մասին խոսելու հիմքեր չկան։