ՀՀԿ-ական պատգամավոր Մհեր Սեդրակյանը վստահեցնում է, որ Երևանի ավագանու ընտրություններում Էրեբունի վարչական շրջանում որևէ ընտրակաշառք չի բաժանվել: Իսկ ընտրություններում լարված մթնոլորտ են ստեղծել այն կուսակցությունները, որոնք չեն մասնակցել նախագահական ընտրություններին:

Slaq.am-ի և Yerkir.am-ի թղթակիցների հետ զրույցում Մհեր Սեդրակյանը խոսել է ընտրությունների որակի, թաղային հեղինակությունների, Տարոն Մարգարյանի ունեցվածքի և այլնի մասին: Ստորև ներկայացնում ենք հարցազրույցը.

-Նախքան Երևանի ավագանու ընտրությունները Դուք ասել էիք, որ Ձեր հնարավորությունների սահմաններում անելու եք ամեն բան Տարոն Մարգարյանի հաղթանակի համար: Կմասնավորեցնե՞ք, թե կոնկրետ ինչ եք արել:

-Իմ անելիքը եղել է այն, որ ես իմ ընկերներին, մտերիմներին ասել եմ, որ եթե իմ խոսքն իրենց մոտ արժեք ունի, ընտրեն Տարոն Մարգարյանին:

-Դուք ասում էիք, որ հույսը դրել եք Ձեր հեղինակության վրա:

-Տարոն Մարգարյանը մեր ընկերն է, իր հայրը եղել է մեր ընկերը, հետո ինքը Էրեբունու ծնունդ է, դա էլ մեզ ավելի շատ թասիբի գցեց:

-Ողջ օրվա ընթացքում մամուլը հեղեղված էր ընտրախախտումների մասին լուրերով: Խոսվում էր այն մասին, որ մարդկանց ահաբեկում են, կաշառք են բաժանում, կնիքը ցնդում է: Դուք ինչպե՞ս կամփոփեք օրը: Էրեբունի վարչական շրջանում ինչպե՞ս էր վիճակը, ճնշումներ, լուրջ դեպքեր արձանագրվե՞լ են:

-Ես նկատեցի, որ առավոտվանից բոլոր կուսակցությունները' բացի «Օրինաց երկիր» կուսակցությունից, միացել էին իրար և ինտրիգներ էին սարքում:

-Այսինքն' տեղեկություններն իրականությանը չէ՞ին համապատասխանում: Ի վերջո, ընտրակաշառք եղե՞լ է, թե՞ ոչ:

-Համենայնդեպս Էրեբունիում նման բաներ չեն եղել: Մարդիկ կան' լսել են, որ բաժանել են, բայց քանի որ չենք բռնել տեսել, չենք կարող ասել' բաժանել են, թե ոչ: Լսում ես, բայց պիտի փաստը բռնես:

-Այսինքն' միանշանակ կարող եք ասել, որ Էրեբունի վարչական շրջանում ՀՀԿ-ի կողմից ընտրակաշառք չի՞ բաժանվել:

-Այո, միանշանակ ասում եմ, որ չի բաժանվել: Ընտրակաշառքն այն է, որ տարիներ շարունակ մարդկանց լավություն ենք անում և հենց դրա դիմաց էլ մարդիկ պարտավորվում են քեզ լսելու, քո ասածն անելու: Մեր Էրեբունի համայնքում միշտ այդպես է եղել: Այս ընթացքում եղել են դեպքեր, որ ես խոստացել եմ լուծեմ հիվանդության հետ կապված խնդիրներ:

-Իսկ հեղինակություն լինելը ճնշումներ գործադրել ենթադրու՞մ է:

- Դու այնքան հեղինակություն պիտի ունենաս, որ մարդուն ասես' քո խոսքը հարգի, լսի: Իսկ ճնշումով չես կարող ընտրության տանես: Հո չե՞ս մտնելու խցիկ, քվեարկես հետը: Մարդը մտնում է խցիկ' ինչ ուզում' անում է: Ընդհակառակը' եթե ճնշում գործադրես, կարող է քեզ հակառակ այլ ուժի օգտին քվեարկել:

-Տեսանյութ տարածվեց, որ թաղային հեղինակություններ ընտրատեղամասի մոտ փորձում են խոչընդոտել լրագրողների աշխատանքը: Տեղյա՞կ եք արդյոք այդ միջադեպից:

-Մարդիկ ընտրությունը չեն հասկանում: Առաջ' 90-ականներին, եղել են դեպքեր, երբ մարդիկ կանգնել են տեղամասերի դիմաց, եկել են մարդկանց ուղղություն են ցույց տվել' ասելով' գնացեք, սենց արեք: Այն ժամանակ ես էլ եմ շատ ընտրություններին այդպես մասնակցել: Մենք կանգնում էինք ու ասում էինք' ձեր ձայնը տվեք այսինչ կուսակցությանը, իսկ այսօր դա չի աշխատում: Մարդիկ 90-ական թվականներից տեսել են և պատկերացնում են, որ այսօր այդ ժամանակներն են: Այ ընկեր, 2013 թիվն է, ո՞նց կարող ես կանգնել տեղամասի դիմաց, ուղղորդել' ասելով' գնա այս կուսակցությանը կամ այս անձին ձայն տուր:

-Այդ դեպքում ինչու՞ այդ միջադեպը գրանցվեց:

-Այ հենց դա է: Որոշ լրագրողներ չեն պատկերացնում, մտածում են, որ այդ մարդիկ կանգնել են ընտրատեղամասի դիմաց, ուրեմն իրենք ուղղորդում են' ասում են' գնացեք քվեարկեք այսինչ ուժին: Լրագրողներն իրենք էլ են կազմակերպում, սարքում: Ես գիտեմ' Ձեր լրատվությունն ինչպես է աշխատում: Կան նորմալ և աննորմալ մարդիկ: Շատ մարդիկ ամբիցիոզ են, ուզում են մի բան սարքեն, որ իրենց անունը դուրս գա, բայց չի կարելի, մենք հայ ենք, մի բուռ ազգ ենք, եկեք իրար հանդեպ չարությամբ չլցվենք:

-Բայց Դուք ճանաչու՞մ եք այդ թաղային հեղինակություններին:

-Նման բան չկա: Ի՞նչ թաղային հեղինակություն: Մարդիկ պարզապես լավ տրամադրություն ունեն, հավաքվում են տեղամասերի մոտ: Եթե մարդը գալիս է ընտրության, ինքը տանից տրամադրված դուրս է գալիս, ինչ ուզում ես ասա, քո խոսքը ընտրատեղամասի դիմաց արժեք չունի: Մինչև տեղամաս գալը դու նրան պիտի նախապատրաստես, խնդրես, ասես, որ դա է ճիշտը, իրենք գան ու քո ասած ուժին ընտրեն: Իսկ եթե գան տեղամասի դիմաց, ժողովուրդն այնքան չհասկացող է, անխելք է, որ երկու վայրկյանում կարող ես նրան փոխե՞լ, չի կարող նման բան լինել:

-Կհամաձայնեք, թե ոչ, սակայն ավագանու ընտրությունների օրը մի տեսակ ագրեսիա կար, մթնոլորտը բոլորովին այլ էր, քան նախագահական ընտրությունների ժամանակ էր, ինչո՞վ էր դա ըստ Ձեզ պայմանավորված:

-Այստեղ մասնակցում էին կուսակցություններ, որոնք նախագահական ընտրություններում չէին մասնակցում, իրենք էին այդ տրամադրվածությունը սարքում: Իրենք նախագահական ընտրություններին վախեցան դուրս գալ' մտածելով, որ կպարտվեն, խայտառակ կլինեն: Դրանից առաջ ամպագոռգոռ բառեր էին ասում' կդնենք կջարդենք, կփշրենք, այսօր ստիպված առաջադրվեցին, քանի որ եթե կուսակցություն ես, ընտրություն է' ոնց չմասնակցես: Արդեն առավոտվանից իրենք էին այդ ինտրիգները սարքում:

-Բայց այդ լարվածությունը Հանրապետականի կողմից էր:

-Հանրապետականի կողմից չէր: Իրենք մտածում էին, որ խայտառակ են լինելու, ստից բաներ էին սարքում, որ հետո էլ ասեին' դե այստեղ այսպես արեցին, ճնշեցին, նեղեցին, դրա համար էլ արդյունքն այսպես եղավ:

-Մի քանի ընտրախախտում կասե՞ք, որ գրանցվեց Էրեբունի վարչական շրջանում:

-Լուրջ բան չի եղել: Կարող է պատահականություններ լինեն, բայց դա չի կարելի մտածված համարել: Մարդ սխալ չի՞անում. հանձնաժողովներում ոչ ոք էլ վերապատրաստված չէ, որ ամեն բան հարթ ընթանա: Մարդ է, կարող է օրենքը լավ չի իմանում, մի թեթև խախտում է անում, հետո շտկում է: Նայում ենք, որ մտածված արեց... չարությունը մեր միջից պիտի դուրս գա: Եթե այսպես շարունակենք, վաղը մյուս օր, սաղ մեր ազգով իրար թշնամի ենք լինելու այս կուսակցությունների երեսից:

-Վերջին շրջանում մամուլում շատ քննարկվեց Տարոն Մարգարյանի ունեցվածքի մասին: Ձեզ համար տարօրինակ չէ՞, որ նա այդքան մեծ թվով ունեցվածք ունի:

-Իմ տղայի համար էլ են գրել' իրեն որտեղից այսքան ունեցվածք: Իմ աշխատածը իմ տղայինը չէ՞, կամ Տարոն Մարգարյանի հայրը' Անդրանիկ Մարգարյանը հեչ բան չի՞ ունեցել: Բա ու՞մ պիտի տար այդ ունեցվածքը: Բնական է' Տարոնին պիտի տար: Նա որտեղի՞ց այդքան ժառանգություն պիտի ունենա, կամ իմ տղան որտեղի՞ց պիտի ունենա: Նա նոր եկել է Հայաստան, բնական է' իմ ունեցվածքը նրանն է, կարող է հետս տանեմ գերեզմաննե՞ր: Զարմանալու բան չկա: Նրա ունեցվածքը կարող էր ավելին լիներ, եթե իր հոր տեղն ուրիշ մեկը լիներ:

-Դեռ ուժի մե՞ջ է Ձեր այն հայտարարությունը, որ Ձեր որդին ավագանի չի գնա, և չի բացառվում, որ եթե առաջարկեն' մեկ այլ լավ պաշտոնի գնա:

-Ինքը քաղաքապետարանում չի աշխատի, եթե առաջարկեն այլ պաշտոն, կգնա: Իսկ այսօր աշխատողներից ո՞վ է իրենից խելոք, իմ տղան ինչու՞ պիտի չաշխատի: Ջահել տղա է, կյանքը նրա դիմաց է: Այդ ո՞ր մի պաշտոնյան շատ առավելություն ունի իր գիտական աշխատանքում կամ թեկուզ խելքով, կրթությամբ, որ այսօր աշխատում է:

-Իսկ ինչու՞ քաղաքապետարանում չի աշխատի:

-Նա չի ուզում: Մենք այդպես տրամադրված ենք եղել: Ես գիտեմ, որ նա եթե մի բան մտածում է' այդպես էլ անում է: Եթե նա ցանկանար այդ կառույցներում աշխատել, այնպես կանեինք, որ թաղապետ կդառնար, բայց արդեն մենք չենք ուզում մտնել քաղաքապետարան կամ թաղապետարան: Թող ուրիշ տեղ մտնի:

-Իսկ ո՞ր բնագավառում նա կաշխատի:

-Ազնվությամբ չեմ կարող ասել: Ես չեմ կարող հարցին պատասխանել, որովհետև նա ուրիշ ոճի մեջ է: Բնական է' կրթությունը կա, ամեն ինչը կա, ինքը կարող է պահի տակ մի բան մտածել ու ասել: Որտեղ էլ որ նշանակեն աշխատանքի, ինձ թվում է, որ իմ տղան կաշխատի շատ լավ: Աշխատելն էլ մարդու թասիբից է գալիս: Եթե նորմալ մարդ է, թասիբով մարդ է, որտեղ էլ նշանակեն աշխատելու, բնական է, լավ կաշխատի:

-Իսկ նա ի՞նչ մասնագիտություն ունի:

-Տնտեսագետ, սովորել է միջազգային հարաբերությունների եվրոպական դեպարտամենտում: