Թուրքիայի վարչապետ Ռեջեփ Թայիփ Էրդողանը Ստամբուլի Ղեզի զբոսայգում հավաքված և իր կառավարության դեմ բողոքող ցուցարարներին վերջնագիր է ներկայացրել: Ինչպես գրում է The Guardian-ը, կառավարության ղեկավարը ցուցարարներին մեկ օր ժամանակ է տվել Թաքսիմ հրապարակն ու կից Ղեզի զբոսայգին դատարկելու համար:
«Ավելի վաղ մենք հարվածին հարվածով չէինք պատասխանում: Սակայն այժմ անվտանգության ուժերը բոլորավին այլ կերպ են գործելու: Սրան պետք է վերջ տրվի 24 ժամվա ընթացքում», -խոստացել է Էրդողանը: Ընդ որում՝ վարչապետը չի պարզաբանել, թե ինքը ինչ ի նկատի ուներ՝ «բոլորովին այլ կերպ» ասելով:
Ավելի վաղ վարչապետի համախոհները ուղղակիորեն հայտարարում էին, որ ոստիկանությունը ուժով դուրս կմղի ցուցարարներին զբոսայգու տարածքից: Ինչպես հայտնում է The Guardian-ը, ցուցարարներին դա քիչ է վախեցրել, և նրանք ոչ մի տեղ չեն պատրաստվում հեռանալ: Վարչապետի վերջնաժամկետին ոչ ոք չի պատրաստվում ականջ դնել: Ցուցարարները պատրաստվում են իրենց ճամբարի վրա կատարվելիք հերթական հարձակմանը:
