Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման եվրոպական կոմիտեն (ԽԿԿ) հրապարակել է 2012թ.-ի հունիսին Թուրքիա կատարած հատուկ այցի, ինչպես նաև այդ երկրի իշխանությունների պարզաբանումների մասին իր զեկույցը: Ինչպես տեղեկանում ենք ԵԽ պաշտոնական կայքէջից, այցը պայմանավորված էր 2012թ.-ին ստացված տեղեկատվությամբ, որում նշվում էր Թուրքիայում՝ Ադանայի Պոզանթի բանտում, անչափահաս կալանավորների նկատմամբ դաժան վերաբերմունքի, նաև կալանավորների միջև բռնությունների մասին: Պատվիրակությունն այցելել է Անկարայի անչափահասների Սինկան բանտը, որտեղ տեղափոխվել էին մինչ այդ Պոզանթի բանտում պահվող բոլոր անչափահաս կալանավորները, ինչպես նաև՝ Ստամբուլի Մալթեփե բանտը և Դիարբեքիր ու Գազիանթեփ քաղաքների բանտերի անչափահասների բաժանմունքներ: Նախկինում Պոզանթի բանտում պահված անչափահասներից շատերն իրենց դիմումներում հետևողական և հիմնավոր պնդում էին, որ իրենց նկատմամբ այլ կալանավորների կողմից հաճախ կիրառվել են դաժան բռնություններ: Բացի այդ, ոմանք նաև պնդում էին, որ Պոզանթի բանտ ժամանելուն պես իրենք աշխատակիցների կողմից բռնությունների են ենթարկվել: Իրենց մեկնաբանություններում Թուրքիայի իշխանությունները ներկայացրել են բանտերի աշխատակիցների և անչափահաս կալանավորների նկատմամբ հարուցված քրեական և վարչական գործերի մասին տեղեկատվություն:
