Հայոց ցեղասպանության հարյուրերորդ տարելիցին ընդառաջ Հայ դատի Եվրոպայի հանձնախումբը աշխատում է ինչպես առանձին ան­հատների, այնպես էլ Եվ­րո­պական Միու­թյան հաստատությունների հետ։ «Արմենպրես»-ի փոխանցմամբ' Ֆրանսիայում լույս տեսնող «Նոր Յառաջ» հասարակական-քաղաքական և գրական թերթին տված հարցազրույցի ժամանակ նշել է Հայ դատի Եվրոպայի գրասենյակի հաղորդակցության պատասխանատու Պետո Դեմիրճյանը:

«Մենք կենտրոնացած ենք քա­ղաքա­կան միտք ձևավորելու վրա, որը կընդգրկի նաև իրավական պա­հանջներ։ Հայ դա­տի ցան­ցե­րը ճա­նաչու­մից մի քայլ առաջ կգնանˋ պահանջելով քա­ղաքա­կան հա­տու­ցում։ Այդ նպատակով մենք դի­մել ենք մի­ջազ­գա­յին իրա­վաբան­նե­րի և ար­դեն պատրաստել ենք թղթած­րար»,- ասել է Դեմիրճյաննˋ ընդգծելով, որ հա­յու­թյան մոտ պետք է ձևավորել հա­տուցման կա­րևո­րու­թյան գա­ղափա­րը։

100-րդ տա­րելի­ցին նվիրված նա­խաձեռ­նություննե­րի մասովˋ Հայ դատի գրասենյակները, նրա խոսքով, պատրաստ են օժանդակել բո­լոր տեսակի ծրա­գրերիˋ ցույ­ցեր, դա­սախո­սու­թյուններ, ցու­ցա­հան­դեսներ, երաժշտա­կան հու­շ-ե­րեկույթ­ներ։ Դրանք համագործակցում են նաև Թուրքիայում ցեղասպանության ենթարկված մյուս ազգային փոքրամասնությունների հետ:

Անդրադառնալով վերջին տարիներին Արևելյան և Կետրոնական Եվրոպայի մի շարք երկրներում Հայ դատի նոր հանձնախմբերի ստեղծմանը' Դեմիրճյանը նշել է, որ այդ երկրները մեծ կարևորություն ունեն: «Այդ երկրները հակառուսական տրամադրություններ ունեն, իսկ Հայաստանըˋ որպես Ռուսաստանի դաշնակից պետություն, դառնում է նման մո­տեցումնե­րի «զո­հը»:

Ավելին, այդ երկրներումˋ մասնավորապես Ռումինիայում, մեծ է ադրբեջանական ներկայությունը: Ադրբեջանի հակահայկական քա­րոզ­չությաննը հա­կակշռե­լու հա­մար նոր հանձնախմբեր են բացվում այդ երկրներում»,- պարզաբանել է Եվրոպայի Հայ Դատի գրասենյակի հաղորդակցության պատասխանատուն:

Նրա խոսքովˋ Հայ դատի հանձնախմբերը ապակենտրոնացված ձևով են աշխատումˋ տվյալ երկրի պայմաններին համապատասխան: Կիպրոսի կամ Հունաստանի Հայ դատի գրասենյակներին չի կարելի համեմատել Գերմանիայում կամ Շվեդիայում գործողների հետ

Իսկ ինչ վե­րաբե­րում է Հայ դատի Եվրոպայի կենտրոնական գրասենյակին, ապա գտնվելով Բրյուսելում, ուր տեղակայված են Եվ­րա­խորհրդա­րանը, Եվրա­խոր­հուրդը և եվ­րո­պական մյուս բարձրա­գույն ատյան­նե­րը, դրանք կարողանում են հայ­կա­կան որևէ հարց ներ­կա­յաց­նել տարբեր երկրների պատգամավորններին: