Այժմյան Թուրքիայի տարածքում գտնվող Վան նահանգում թուրք հնագետներն ակտիվ պեղումներ են իրականացնում ուրարտական Այանիս (հայերեն Այանց - tert.am) ամրոցի տարածքում, այս մասին հայտնում է թուրքական arkeolojihaber.net կայքը:
Վան քաղաքից 38 կմ հեռավորության վրա գտնվող պատմական ամրոցը կառուցվել է Ուրարտուի Ռուսա Երկրորդ արքայի կողմից շուրջ 2700 տարի առաջ:
Հետազոտական աշխատանքներին մասնակցող թուրք հնագետ, պրոֆեսոր Մեհմեդ Ըշըքլըն նշել է, որ Այանցը, լինելով Ուրարտուի վերջին ամրոցներից մեկը, մեծ կարևորություն է ներկայացնում ուրարտական ժամանակաշրջանի ուսումնասիրմամբ զբաղվող մասնագետների համար:
«Ռուսա Երկրորդ արքայի կառուցած 5 ամրոց է մեզ հայտնի: Դրանցից երեքը գտնվում են Վանում, մեկը Իրանում և ևս մեկը Հայաստանի տարածքում», - ասել է թուրք պրոֆեսորը:
