Իրաքյան անվտանգության աղբյուրները տեղեկացնում են, որ անվտանգության ուժերը Սալահ ադ Դին մարզի Մալիհա գյուղում «Իսլամական պետության» 11 ահաբեկիչ են ոչնչացրել, այրել են նրանց 4 մեքենաները: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, ահաբեկիչները Սալահ ադ Դին մարզի Թիրքիթ քաղաքի կենտրոնում հնագույն գերեզման են այրել:
Անբար մարզում Ջողաֆիա կողվող ցեղախմբի հետ անվտանգության ուժերը կանխել են ԻՊ-ի հարձակումը Հադիսա քաղաքի վրա: ԻՊ-ն 8 տանկով հարձակում է գործել քաղաքի վրա՝ օգտագործելով հրթիռներ և հրասանդներ, սակայն անվտանգության ուժերին հաջողվել է քաղաքում անվտանգություն ապահովել:
Նինվե մարզում սպանվել են ԻՊ-ի ակնառու ներկայացուցիչներից Աբու Դիաա ալ Յամանին և կազմակերպության ևս 2 անդամներ:
Մյուս կողմից' Իտալիայի պաշտպանության նախարարությունը հայտարարել է, որ 280 զինվորականների է ուղարկել Իրաք ԻՊ-ի դեմ պայքարող իրաքյան ուժերին օժանդակելու համար:
Կանադայի պաշտպանության նախարարությունը տեղեկացրել է, որ կանադական օդային ուժերը Անբարի մարզում ոչնչացրել են ԻՊ-ի շինարարական տեխնիկան և ապստամբների ինժեներական կառույցները: Ավելի վաղ տեղեկություններ էին ստացվել, որ կանադական օդային ուժերը ռմբակոծել են Իրաքում ԻՊ-ի դիրքերը:
«Իսլամական պետությունը» համարվում է խոշորագույն ահաբեկչական կազմակերպություններից մեկն աշխարհում: Կազմակերպությունը 2014թ. հունիսին հայտարարել է Իսլամական խալիֆաթ ստեղծելու մասին, որն ընդգրկում է Հալեպից մինչև Իրաքի Դիյալա ընկած տարածքները: Խալիֆ է նշանակվել Աբու Բաքր ալ Բաղդադին:
Միջազգային դաշինքը ԱՄՆ-ի գլխավորությամբ մեկ ամսից ավելի է պայքարում է ԻՊ-ի դեմ: ԱՄՆ-ին աջակցում են ավելի քան 50 երկիր:
