Ազգային ժողովում Եվրասիական տնտեսական միության Հայաստանի անդամակցության պայմանագրի քվեարկությունը արտացոլում էր հայ հասարակության կարծիքը այդ հարցի վերաբերյալ: Այս մասին դեկտեմբերի 8-ին լրագրողների հետ հանդիպմանն ասաց ԱԺ ՀՀԿ խմբակցության պատգամավոր Արտակ Դավթյանը: «Ես կարծում եմ, որ մենք կատարել ենք ճիշտ ընտրություն, որի հետ համաձայն է հասարակության մեծամասնությունը: Եվ Ազգային ժողովում տեղի ունեցած քվեարկությունն արտացոլում էր հասարակության կարծիքը»,-«Արմենպրես»-ի հաղորդմամբ՝ նշեց Դավթյանը:

Նա ընդգծեց, որ Հայաստանը մշտապես կողմնակից է եղել «և և»-ի քաղաքականությանը և փորձել է գնալ այդ ճանապարհով, սակայն Արևելյան Եվրոպայի երկրները Հայաստանին պարտադրել են ընտրել կամ ԵՄ-ն կամ ՄՄ-ն, իսկ Հայաստանն էլ կատարել է այն ընտրությունը, որը պետք է կատարեր: «Եվ պետք է նշեմ, որ անդամակցելով Եվրասիական տնտեսական միությանը, մենք ամբողջովին չենք հրաժարվում Արևմուտքի հետ համագործակցությունից»,- նշեց պատգամավորը:

Դիտարկման հետ, թե ԵՏՄ-ին Հայաստանի անդամակցության պայմանագրի վերաբերյալ բավարար քննարկումներ և դեբատներ չեն ծավալվել, Արտակ Դավթյանը չհամաձայնեց, ընդգծելով, որ քննարկումներ եղել են: «Քննարկումներ եղել են, և ես չեմ կարծում, որ կարիք էլ կար քննարկումներ ծավալել ուղղակի քննարկումների համար: Երբ ասում եք, որ պետք էր հարցը քննարկել տնտեսագետների հետ, պետք է նախ ընդունենք, որ Հայաստանն այնքան էլ չի փայլում տնտեսագիտական մտքով»,- ընդգծեց Դավթյանը:

ՀՀ ԱԺ-ն արդեն վավերացրել է Եվրասիական տնտեսական միությանը Հայաստանի անդամակցության պայմանագիրը: Պայմանագրին կողմ է քվեարկել 103, դեմ՝ 7, ձեռնպահ՝ 1 պատգամավոր: ԵՏՄ-ն կսկսի գործել 2015թ. հունվարի 1-ից, անդամներն են' Հայաստանը, Ռուսաստանը, Բելառուսը, Ղազախստանը: