Կանադայի Տորոնտո քաղաքում «Մեկ ազատ աշխարհ» հասարակական կազմակերպության օժանդակությամբ և Կանադայում ՀՀ դեսպանության աջակցությամբ հունվարի 25-ին տեղի է ունեցել Հայոց ցեղասպանության 100-րդ տարելիցին նվիրված միջոցառում: Ինչպես «Արմենպրես»-ին տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, միջոցառմանը, որպես գլխավոր բանախոսներ, մասնակցել են Կանադայի աշխատանքի, սոցիալական զարգացման և բազմամշակութայնության նախարար Ջեյսոն Քեննին և Կանադայում ՀՀ դեսպան Արմեն Եգանյանը:
Դեսպան Եգանյանն իր ելույթում խոսել է Հայոց ցեղասպանության հետևանքների մասին' ընդգծելով Հայոց ցեղասպանության միջազգային ճանաչման անհրաժեշտությունը ինչպես աշխարհասփյուռ հայության, այնպես էլ միջազգային հանրության համար: Հայաստանի դեսպանն անդրադարձել է նաև Հայաստանում, Կանադայում և այլուր 2015թ. ակնկալվող ոգեկոչման միջոցառումներին:
Միջոցառմանը ներկա են եղել շուրջ 1000 մասնակիցներ, որոնց թվում են եղել Տորոնտոյի կաթոլիկ, բողոքական եկեղեցիների առաջնորդներ, Տորոնտոյի րաբբին, ներկայացուցիչներ քրդական, եզդիական, իսմայիլիների համայնքներից, ինչպես նաև կանադահայ համայնքի ներկայացուցիչներ: Միջոցառմանը մասնակցել է նաև Ստամբուլից ժամանած թուրք հոգևորական, պատվելի Հաքան Թաշթանը, ով թուրք ժողովրդի անունից ներողություն է խնդրել Հայոց ցեղասպանության համար:
