Ադրբեջանի բանակի զինծառայողներ Թուրալ Ահլիմանլըն և Օրխան Գուլուզադեն վերջինիս կողմից վարվող VAZ2106 ավտոմեքենայով անցած գիշեր ճանապարհատրանսպորտային պատահարի են ենթարկվել Թովուզի շրջանի Օյսուզլու գյուղի մոտ: Այս մասին, ինչպես հաղորդում է «Արմենպրես»-ը, հայտնում է ադրբեջանական «Քեփեզ ԹՎ» (Region TV) հեռուստաալիքը:
Ականատեսների խոսքով՝ մեծ արագությամբ ընթացող ավտոմեքենան, կորցնելով կառավարումը, ճանապարհից դուրս է եկել և մի քանի անգամ շրջվելուց հետո բախվել մոտակա շենքին: Նրանք ծանր մարմնական վնասվածքներով տեղափոխվել են Թովուզի կենտրոնական շրջանային հիվանդանոց:
Օրխան Գուլուզադեն Շամքիրի շրջանից է, իսկ Թուրալ Ահլիմանլըն՝ Բեյլագանի շրջանից: Փաստի առնչությամբ Թովուզի ոստիկանությունը հետաքննություն է սկսել: Այլ մանրամասներ չեն հաղորդվում:
