Բաքվի Նասիմիի շրջանային դատարանը եւս երկու ամսով' մինչեւ մայիսի 24-ը երկարաձգել է լրագրող Խադիջա Իսմայիլովայի ձերբակալության ժամկետը:
Այս մասին, ինչպես հաղորդում է «Արմենպրես»-ը' վկայակոչելով «Թուրանը», հայտնել է նրա փաստաբան Ֆարիզ Նամազլըն:
Խ. Իսմայիլովան «ինքնասպանության հասցնելու» մեղադրանքով ձերբակալվել էր 2014 թվականի դեկտեմբերի 5-ին: 2015 թվականի փետրվարի 13-ին դատախազությունը նրա դեմ եւս երեք ' «խոշոր չափերի յուրացումների», «ապօրինի ձեռնարկատիրության» եւ «ծանր հետեւանքներով պաշտոնեական լիազորությունների չարաշահման» հոդվածներով մեղադրանքներ է առաջադրել:
Հետաքննությունը նրա կալանքի տակ պահելու որոշումը պատճառաբանում է այն բանով, որ Իսմայիլովան կարող է ճնշում գործադրել վկաների վրա եւ թաքնվել հետաքննութունից:
Իսմայիլովան իր նկատմամբ առաջադրված մեղադրանքներն աբսուրդ է անվանել եւ ժխտել դրանք: Նա նշել է, որ «Ազատություն» ռադիոկայանի Բաքվի գրասենյակի ղեկավար եղած ժամանակ աշխատանքի վերցնելու եւ ֆինանսական հարցեր լուծելու լիազորություններ չի ունեցել, եւ եղել է միայն համակարգող Բաքվի ու Պրահայի գրասենյակների միջեւ: Խ.Իսմայիլովան ժխտել է նաեւ Թուրալ Մուստաֆաեւին «ինքնասպանության հասցնելու» մեղադրանքը եւ դատարանից պահանջել ապահովել նրա ներկայությունը հետաքննությանը, ինչը դատարանը մերժել է:
Չնայած Թ. Մուստաֆաեւը երկու ամիս առաջ հետ է վերցրել իրեն «ինքնասպանության հասցնելու» մասին Խ. Իսմայիլովայի դեմ ներկայացրած հայցը, սակայն, գոնե այդ մասով, նրա դեմ մեղադրանքը չի կարճվել:
Խադիջա Իսմայիլովան Ադրբեջանի իշխանությունների թիրախ է դարձել իր լրագրողական գործունեության համար: Իսմայիլովան հանդիսանում է Ադրբեջանում իշխանության վերին էշելոններում կոռուպցիոն փաստերի լրագրողական հետաքննությունների հեղինակ, որոնց արդյունքում բացահայտվել է նաեւ Ադրբեջանի նախագահ Իլհամ Ալիեւի եւ նրա ընտանիքի' օֆշորյան գոտիներում ունեցած հարյուր միլիոնավոր դոլարների հասնող ունեցվածքը: Վերջին տարիներին նա թոք-շոու էր վարում «Ազատություն» ռադիոկայանի ադրբեջանական ծառայությունում:
Խադիջա Իսմայիլովայի ձերբակալությունը դատապարտել են Եվրամիությունը, Եվրոպայի Խորհուրդը, Եվրոպական խորհրդարանը, Եվրահանձնաժողովը, ԵԱՀԿ-ը, ԱՄՆ-ի պետքարտուղարությունը, «Լրագրողներ առանց սահմանների» կազմակերպությունը, «Մարդու իրավունքների տուն» հիմնադրամը, Ազատ Եվրոպա/Ազատություն ռադիոկայանների կորպորացիաների գլխավոր տնօրեն Նենադ Պեջիկը, ԱՄՆ-ի հրատարակչական խորհուրդը, ԵԱՀԿ-ում ԱՄՆ-ի ներկայացուցիչ Դենիել Բայերը, Ադրբեջանի «Մուսավաթ», «Ումիդ», «Ժողովրդական ճակատ» կուսակցությունները եւ բազմաթիվ այլ միջազգային իրավապաշտպան կազմակերպություններ:
Կանանց միջազգային օրվա' Մարտի 8-ի կապկացությամբ «Լրագրողներ առանց սահմանների» կազմակերպությունը Խադիջա Իսմայիլովային ներառել է 10 կին լրագրողների ցուցակում, որոնք գտնվում են կալանքի տակ աշխարհի տարբեր կետերում պետական մակարդակով կոռուպցիայի մասին գրելու համար:
