Թուրքիայի կենտրոնական ընտրական հանձնաժողովը հրապարակել է արտահերթ խորհրդարանական ընտրությունների անցկացման ժամկետը. դրանք տեղի կունենան առաջիկա նոյեմբերի 1-ին:
Այս մասին, ինչպես հաղորդում է «Արմենպրես»-ը' վկայակոչելով թուրքական ԶԼՄ-ները, հայտարարել է Թուրքիայի ԿԸՀ նախագահ Սադի Գյուվենը:
«Հաշվի առնելով ձնեռային եղանակի դժվարությունները, որոշվել է խորհրդարանական ընտրություններն անցկացնել նոյեմբերի 1-ին»,- ասել է նա:
Ավելի վաղ, մինչեւ Թուրքիայում արտահերթ խորհրդարանական ընտրությունները նոյեմբերի 1-ին անցկացվելու վերաբերյալ ԿԸՀ որոշման ընդունումը, դրանց անցկացման մասին հայտարարել էր Թուրքիայի Նախագահ Ռեջեփ Թայիփ Էրդողանը:
Թուրքական ԶԼՄ-ների համաձայն' Էրդողանն ամեն բան արեց, որպեսզի երկրում հունիսի 1-ին տեղի ունեցած ընտրությունների արդյունքներով, որտեղ իշխող «Արդարություն եւ զարգացում» կուսակցությունը անհրաժեշտ քանակի պատգամավորական աթոռներ չզբաղեցնելու պատճառով զրկվել էր միակուսակցական կառավարություն ձեւավորելու իրավունքից, խորհրդարան անցած ընդդիմադիր Ժողվորդահանրապետական (ԺՀԿ), Ազգայնական շարժում (ԱՇԿ), եւ քրդական Ժողովուրդների դեմոկրատական (ԺԴԿ) կուսակցությունների հետ կոալիցիոն կառավարություն չստեղծվի, եւ երկիրը գնա արտահերթ խորհրդարա նական ընտրությունների, հույս ունենալով, որ այս անգամ ԱԶԿ-ին կհաջողվի միանձնյա կառավարություն կազմել:
Թուրքիայում արդեն մեկնարկել է ժամանակավոր կառավարություն ձեւավորելու գործընթացը: Դա հանձնարարվել է Թուրքիայի ներկայիս վարչապետ Ահմեթ Դավութօղլուին, ով, այսպես կոչված, «ընտրական կառավարություն» պետք է ձեւավորի առաջիկա 5 օրերի ընթացքում: Ժամանակավոր կառավարությունը պետք է գործի մինչեւ նոր ընտրությունների ավարտը:
Թուրքական ԶԼՄ-ների համաձայն' ԱԶԿ-ը ժամանակավոր կառավարությունը կկազմի ԺԴԿ-ի հետ, քանի որ ԺՀԿ-ը եւ ԱՇԿ-ը հրաժարվել են մասնակցել նոր կառավարության աշխատանքներին: Ենթադրվում է, որ Դավութօղլուն նոր կառավարությունում ԺԴԿ-ին կառաջարկի գլխավորել Եվրամիության գործերով, սպորտի եւ երիտասարդության, անտառտնտեսության եւ ջրային ռեսուրսների նախարարությունները:
