Սարսանգի ջրամբարի վերաբերյալ ԵԽԽՎ-ում ընդունված հակահայկական բանաձևը որևէ կերպ չի կարող ազդեցություն ունենալ Լեռնային Ղարաբաղի հակամարտության կարգավորման բանակցությունների վրա:
Ռազմավարական և ազգային հետազոտությունների հայկական կենտրոնում կազմակերպված քննարկմանը նման կարծիք հայտնեց քաղաքագետ Սերգեյ Մինասյանը: «Նման բանաձևերը որևէ կերպ չեն կարող ազդեցություն ունենալ հիմնահարցի կարգավորման բանակցությունների վրա: Եվ պետք էլ չէ մտածել, որ միայն իրավական մեթոդներով հնարավոր է հասնել արցախյան հիմնահարցի կարգավորմանը: Հիմնախնդրի կարգավորման գործընթացում կարևոր նշանակություն ունեն ռազմաքաղաքական, տնտեսական գործոնները: Իսկ այդպիսի բանաձևերի ընդունումը կամ չընդունումը որևէ ազդեցություն ու նշանակություն ունենալ չի կարող»,- «Արմենպրես»-ի հաղորդմամբ՝ նշեց Մինասյանը:
Քաղաքագետը չհամաձայնեց ԱԺ պատգամավոր Թևան Պողոսյանի կարծիքի հետ, թե Ադրբեջանը տարբեր կառույցներում հակահայկական բանաձևեր է նախաձեռնում, որովհետև ցանկանում է հղումների դաշտ ստեղծել՝ հետագայում ռազմական գործողությունների համար հիմնավորումներ գտնելու համար: Նա ընդգծեց, որ Ադրբեջանը պատերազմ չի սկսում ոչ թե նրա համար, որ չի կարողանում հիմնավորում գտնել դրա համար, այլ ռազմաքաղաքական իրողությունն է նրան կանխում: «Ես վստահ եմ, որ երբ Ադրբեջանը վստահ լինի, որ ռազմաքաղաքական ու քաղաքական իրողությունն իր համար նպաստավոր է, նա կսկսի ռազմական գործողություններ: Իսկ հիմնավորում գտնել նրանք այսպես թե այնպես կկարողանան»,- ասաց քաղաքագետը:
Քաղաքագետը համաձայն չէ նաև հնչող տեսակետի հետ, թե ԵԽԽՎ-ում հայկական պատվիրակությունն էլ պետք է նախաձեռնող լինի և հակաադրբեջանական զեկույցներ նախաձեռնի: Նրա խոսքով՝ իրականում նման զեկույցները կամ բանաձևերը չեն կարող էական ազդեցություն ունենալ ԼՂ հիմնախնդրի կարգավորման համար: «Եթե նման նախաձեռնությունները պետք է որևէ դրական փոփոխության չհանգեցնեն, ապա ես անիմաստ եմ համարում, որ Հայաստանը փորձի Լեռնային Ղարաբաղի հակամարտության հարցը դուրս բերել ԵԱՀԿ մինսկի խմբի շրջանակից ու այլ հարթակներում քննարկել: Այլ բան է, եթե մենք համոզված լինենք, որ նման նախաձեռնությունները կարող են որոշակի դրական փոփոխությունների հանգեցնել»,- հավելեց Մինասյանը:
