Եվրամիության կազմից դուրս գալու Մեծ Բրիտանիայի պատմական որոշումը կփոխի երկրի դերն աշխարհում ու կցնցի մայրցամաքը, գրում է The New York Times-ը:
Հանրաքվեի արդյունքները ցնցեցին Մեծ Բրիտանիան, Եվրոպան և Տրանսատլանտյան դաշինքը:
Բրիտանիան կդառնա առաջին երկիրը, որը կլքի 28 անդամից բաղկացած միությունը: Պատմական այս որոշումը բեկումնային պահ է Բրիտանիայի պատմության մեջ, որը կարող է դասակարգվել 20-րդ դարի երկու համաշխարհային պատերազմների հետ նույն շարքում, գրում է The Guardian-ը: Բրիտանիան ստիպված կլինի այդ քայլի քաղաքական, սահմանադրական, դիվանագիտական և տնտեսական հետևանքներով ապրել մեկ կամ ավելի տասնամյակ, հավելում է լրատվամիջոցը:
Միջազգային ԶԼՄ-ները, անդրադառնալով հանրաքվեի արդյունքներին, փորձել են ներկայացնել, թե ինչ է լինելու ԵՄ-ից Բրիտանիայի դուրս գալուց հետո:
Անմիջապես՝ ոչինչ, գրում է The Economist-ը: Ամեն ինչ կախված կլինի բանակցություններից, որոնք կարող են տարիներ տևել, իսկ ոչ ոք չգիտի, թե քանի տարի:
Դևիդ Քեմերոնի առաջին նպատակը՝ որպես վարչապետ, կլինի շուկաները «հանգստացնելը»: Ասիայի շուկաներն արդեն արձագանքել են նորությանը: Ֆունտն արդեն 9 տոկոսի անկում է գրանցել դոլարի նկատմամբ և 13 տոկոսի անկում՝ յենի նկատմամբ: Ճապոնիայի հիմնական ֆոնդային շուկան մոտ 8 տոկոսի անկում է գրանցել: Որոշ փորձագետներ նախազգուշացնում են, որ սթերլինգը կարող է 20 տոկոսի անկում գրանցել:
Քեմերոնը խոստացել է, որ Բրիտանիան անմիջապես կդիմի Լիսաբոնի պայմանագրի 50-րդ հոդվածին, որը երկու տարվա ժամկետ է սահմանում՝ դուրս գալու պայմանները համաձայնեցնելու համար: Բայց նրա ճակատագրի վերաբերյալ անորոշությունը կարող է հարցականի տակ դնել այս քայլը, քանի որ այդ հոդվածով Բրիտանիայի դուրս գալու պայմանները պետք է համաձայնեցվեն ԵՄ մյուս 27 անդամների կողմից:
Քեմերոնի համար դժվար կլինի շարունակել պաշտոնավարել, չնայած նա կարող է որոշել մնալ պաշտոնին ամռանը հարթ անցում ապահովելու համար դեպի նոր պահպանողական առաջնորդ: Նոր առաջնորդն իր հերթին ստիպված կլինի գործ ունենալ խորապես պառակտված կուսակցության և խորհրդարանի հետ, որի անդամների մեծ մասը կողմ էին ԵՄ-ում մնալուն և որի մի մասը կարող է ցանկանալ արգելք սահմանել տնտեսական անջատման հաստատման նկատմամբ, գրում է The Economist-ը:
Vox-ը գրում է, որ լավագույն դեպքում Բրիտանիան կարող է բանակցությունների միջոցով մուտք ստանալ եվրոպական շուկա, ինչը զգալիորեն չի տարբերվում ներկայիս վիճակից: Այնուամենայնիվ, լրատվամիջոցը նշում է, որ հանրաքվեի արդյունքների հետևանքով վարչապետը կարող է հրաժարական տալ: Նա ակտիվորեն պաշտպանում էր ԵՄ-ի կազմում մնալը՝ չնայած իր կուսակիցներից շատերի դիրքորոշմանը: ԵՄ-ից դուրս գալու աջակիցների հաղթանակը կարող է լրջորեն թուլացնել նրա դիրքերն իր կուսակցությունում:
Կարճաժամկետ հեռանկարում ԵՄ-ի հետ Բրիտանիայի ապագա հարաբերությունների անորոշությունը կարող է երկիրը ռեցեսիայի տանել: Երկարաժամկետ հեռանկարում իրավիճակը կարող է է՛լ ավելի վատ լինել: ԵՄ-ն կարող է որոշել ծանր պայմաններով համաձայնության հասնել Մեծ Բրիտանիայի հարցում՝ այդպիսով փորձելով այլ երկրներին ապագայում հետ պահել ԵՄ-ից դուրս գալու մտադրությունից: Իսկ դա կարող է լուրջ խնդիրներ առաջացնել Մեծ Բրիտանիայում գտնվող բիզնեսների համար:
Այնուամենայնիվ, լրատվամիջոցը հավելում է, որ ԵՄ-ի կազմից դուրս գալն իր ազդեցությունը հավանաբար կթողնի նաև ներգաղթյալների վրա, որոնց մի մասը կարող են կորցնել այնտեղ ապրելու և աշխատելու իրավունքը:
