Թուրքիայի իշխանությունները կալանավորել են Ռեջեփ Թայիփ Էրդողանի նախագահական գվարդիայի 283 անդամի, որոնք կասկածվում են պետական հեղաշրջման փորձին մասնակցելու մեջ, փոխանցում է BBC-ի ռուսական ծառայությունը:
Գվարդիան, որը կազմված է նվազագույնը 2500 զինծառայողից, տեղակայված է Անկարայի նախագահական պալատում: CNN Turk-ի տեղեկություններով՝ իշխանությունները 300 մարդու կալանքի թույլտվություն են տվել, առայժմ հասցրել են ձերբակալել նրանց, ովքեր գտնվել են մայրաքաղաքում:
Ավելի վաղ Թուրքիայի փոխվարչապետ Նուրեթին Ջանիքլին ասել էր, որ ապստամբությունից հետո 60 հազար մարդու ձերբակալություններն ու հեռացումները միայն «այսբերգի» երևացող մասն է, և խոստացել էր, որ ավելի մեծ թվով ձերբակալություններ կլինեն: Աշխատանքից հեռացվածների և ձերբակալվածների թվում 9 հազարը ոստիկաններ են, 3 հազարը՝ դատավորներ և 6 հազարը՝ զինվորականներ, ինչպես նաև ուսուցիչներ և համալսարանների դեկաններ:
Նախօրեին Թուրքիայում նաեւ որոշել էին ժամանակավորապես կասեցնել Մարդու իրավունքների պաշտպանության եւ հիմնարար ազատությունների եվրոպական կոնվենցիայի գործողությունը՝ կապված երկրում մտցված արտակարգ դրության հետ: Ըստ որում՝ նախագահ Էրդողանը չի բացառում երկրում մահապատիժը մտցնելու հնարավորությունը, որպեսզի ապստամբությունը հրահրողները «հատուցեն կատարածի համար»:
Թուրքիայում զինված ապստամբությունը սկսվեց հուլիսի 15-ի երեկոյան: Մի խումբ զինվորականներ հայտարարեցին, որ երկրի կառավարումը վերցնում են իրենց ձեռքը, որպեսզի ապահովեն քաղաքացների սահմանադրական իրավունքների պաշտպանությունը: Առավոտյան Թուրքիայի իշխանությանը հաջողվեց ամբողջովին վերականգնել իրավիճակի վերահսկողությունը:
