«Հայաստանի Հանրապետություն» օրաթերթը գրում է.
«Հայաստանում անհրաժեշտություն է առաջացել վերանայելու անշարժ գույքի կադաստրային արժեքը, ինչը վաղուց դադարել է համապատասխանել անշարժ գույքի շուկայական գներին: Ըստ պատկան կառույցի՝ գործող կադաստրային արժեքները չեն արտացոլում ներկայիս անշարժ գուքի շուկայի իրական պատկերը, ժամանակավրեպ են։
Կադաստրային արժեքում փոփոխությունները նախատեսված են «Անշարժ գույքի հարկման նպատակով շուկայական գնահատման կարգը սահմանելու մասին» ՀՀ օրենքի նախագծով, ոը դրվել է հանրային քննարկման 2019թ. մարտին, անցել է քննարկումների փուլը եւ կառավարության օրակարգում է. այն կննքարկվի այսօրվա կառավարության նիստում:
«2000- ականներից ի վեր շատ բան է փոխվել,- «ՀՀ»-ի հետ զրույցում նկատել է Անշարժ գույքի կադաստրի պետական կոմիտեի ղեկավար Սարհատ Պետրոսյանը՝ հավելելով, օրինակ՝ Հյուսիսային պողոտա է կառուցվել: Երկրում անշարժ գույքի կադաստրային արժեքը վերագնահատելու անհրաժեշտության հարցը առաջին անգամ չէ, որ բարձրացվում է: Այսօր Երեւանի կենտրոնում գտնվող 1 քմ հողի կադաստրային արժեքը կազմում է 60 հազար դրամ, այն դեպքում երբ իրականում շուկայական գինը կարող է հասնել 400-500 հազար դրամի», - ասել է Սարհատ Պետրոսյանը՝ հավելելով, որ անհրաժեշտ է վերահաստատել գույքի կադաստրային արժեքը, որի հիման վրա եւ ձեւավորվում են հարկերը: Այսինքն՝ այդ ժամանակ ստեղծված կադաստրային գները այլեւս չեն արտացոլում այդ գույքի իրական արժեքը:
