ԱՄՆ-ն Իսրայելին հայտնել է, որ Գազայի հատվածում ռազմական գործողությունը պետք է ավարտվի մինչև հաջորդ տարվա սկիզբ, հայտնում է The Economist-ը։

Հրատարակությանը հասանելի տեղեկությունների համաձայն՝ այս մասին Իսրայելի ղեկավարությանը հայտնել է ԱՄՆ պետքարտուղար Անտոնի Բլինկենը Իսրայել կատարած այցի ժամանակ։ Ըստ ամսագրի՝ Սպիտակ տունը Իսրայելից պահանջել է ավելին անել պաղեստինցի խաղաղ բնակիչների տառապանքը նվազեցնելու համար, հատկապես Գազայի հատվածի հարավում։

Հրատարակությունն ընդգծել է, որ ամերիկացի պաշտոնյաներն իրենց հրապարակային հայտարարություններում չեն նշում իսրայելական ռազմական գործողությունն ավարտելու ժամկետներ։ Այնուամենայնիվ, The Economist-ը ենթադրում է, որ Իսրայելին ընդամենը շաբաթներ են մնացել Գազայի հատվածում ռազմական հաջողությունների հասնելու համար: Այս ժամանակահատվածից հետո, ամսագիրը կարծում է, որ ԱՄՆ-ն կկրճատի Իսրայելին տրամադրվող ռազմական օգնությունը, ինչը մեծապես կբարդացնի նրա վիճակը։ Ընդ որում, բարձր չի գնահատվում իսրայելական բանակի հաջող գործողությունների հավանականությունը։