Մայիսի 8-ին՝ ժամը 10:30, Վճռաբեկ դատարանը կհրապարակի ՀԱԿ ակտիվիստներ Տիգրան Առաքելյանի, Արտակ Կարապետյանի, Դավիթ Քիրամիջյանի և Սարգիս Գևորգյանի գործով դատավճիռը:

Տեղի է ունենալու ընդամենը մեկ նիստ, որտեղ դատավորը հրապարակելու է գործով վճիռը:

Ֆեյսբուք սոցցանցում տարածվում է հայտարարություն, որտեղ կոչ է արվում բոլորին վաղը ժամը 10:30 լինել Վճռաբեկ դատարանի մոտ, հասցեն՝ Վազգեն Սարգսյան 5:

Նշենք, որ ՀՀ վճռաբեկ դատարանը մարտի 21-ին վարույթ էր ընդունել ՀԱԿ 4 երիտասարդ ակտիվիստների բողոքը:

Հիշեցնենք նաև, որ 2011-ի օգոստոսի 9-ին բախում էր եղել ՀԱԿ-ի երիտասարդ ակտիվիստների և ոստիկանների միջև։ Ոստիկանները 7 ակտիվիստի բերման էին ենթարկել ոստիկանության Կենտրոնականի բաժին և քրգործ հարուցել իշխանության ներկայացուցչի նկատմամբ բռնության, ինչպես նաև խուլիգանության մեղադրանքով։ Ակտիվիստների պնդմամբ, ոստիկանները դաժան ծեծի են ենթարկել իրենց։

Հուլիսի 20-ին Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը 6 տարվա ազատազրկման էր դատապարտել Տիգրան Առաքելյանին, 3 տարվա՝ Արտակ Կարապետյանին, և երկուական տարվա՝ Սարգիս Գևորգյանին ու Դավիթ Քիրամիջյանին։

ՀԱԿ ակտիվիստների ազատազրկման դատավճիռը բողոքարկվեց Վերաքննիչ քրեական դատարանում, սակայն դատարանը օրինական ուժի մեջ թողեց Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանի նախագահությամբ կայացված հուլիսի 20-ի դատավճիռը, որով ամբաստանյալները դատապարտվել էին 2-6 տարվա ազատազրկման։

Քաղբանտարկյալների գործով դեկտեմբերի 13-ին դիմում է ներկայացվել Վճռաբեկ դատարան։

Վճռաբեկ դատարանն այս դիմումը վարույթ ընդունելու կամ մերժելու որոշումը պետք է կայացներ մինչև հունվարի 27-ը։ Սակայն ՀՀ Վճռաբեկ դատարանը, կայացրած որոշմամբ, վերադարձրել է Հայ ազգային կոնգրեսի ակտիվիստների նկատմամբ կայացված
դատավճռի դեմ բերված բողոքը:Դատարանը ներկայացված բողոքում թերություններ է հայտնաբերել: Վճռաբեկը քսանօրյա ժամկետ էր հատկացրել բողոքում հայտնաբերված թերությունները շտկելու և այն կրկին դատարան ներկայացնելու համար:

Գործով կրկին դիմում էր ներկայացվել Վճռաբեկ դատարան: