Սպառնո՞ւմ է «Ազատ դեմոկրատներին» լուծարում, թե սա չար ցանկություն է: Այս և այլ հարցերի շուրջ HayNews.am-ը զրուցել է «Ազատ դեմոկրատներ» կուսակցության փոխնախագահ Անուշ Սեդրակյանի հետ:
- Լիբերալ Ալեքսանդր Արզումանյանը լիբերալ «Ազատ դեմոկրատներ»-ը լքեց և Հովհաննես Իգիթյանի , Արարատ Զուրաբյանի և Կարապետ Ռուբինյանի հետ միասին ավետեց ՀՀՇ-ի վերածնունդը, սրա անհրաժեշտությունը կա՞ ազատական քաղաքական հարթակում և ի՞նչ է ենթադրում ԱՄՆ դեսպանի դեռևս չկազմավորված կուսակցության ներկայացուցիչների հետ հանդիպումը, արարողակարգայի՞ն միջոցառում է, թե՞…

- Եթե Ալեքսանդր Արզումանյանը, Հովհաննես Իգիթյանը, Կարապետ Ռուբինյանը և Արարատ Զուրաբյանը համարում են, որ ՀՀՇ-ը խնդիրների լուծման առավել արդյունավետ միջոց է, ուրեմն մենք, իբրև լիբերալներ , չենք կարող խոչընդոտել և վատ արտահայտվել, որովհետև հասկանում ենք' չտալ մարդուն հնարավորություն քաղաքական սեփական գործիքները գործարկելու, կնշանակի գնալ ՀՀԿ-ի ճանապարհով: Բայց, միաժամանակ, ինձ համար լիբերալ արժեք է պատասխանատվությունը, սկզբունքայնությունը, մեկնաբանությունը թողնում եմ….: Ինչ վերաբերում է ԱՄՆ դեսպանի հետ հանդիպմանը, ապա կասեմ' Միացյալ նահանգները լիբերալ երկիր է և նրա հանդիպումները նոր ստեղծվող կամ կազմավորվող կուսակցությունների հետ արարողակարգային բնույթ են կրում և ոչ միայն ԱՄՆ-ի, այլև' Ռուսաստանի, Եվրոպայի, որպեսզի գնահատեն իրավիճակը և տեսնեն, թե ով ինչ է շնչում:

- Ձեր սկզբնական մտքին անդրադառնալով' ստացվում է, որ Ալեքսանդր Արզումանյանը սկզբունքային չէ:

- Ամեն մարդ լիբերալի իր պատկերացումն ունի, բայց ես, լինելով 100 տոկոս լիբերալ, գտնում եմ, որ, այո, արժեք է նաև պատասխանատվությունը, սկզբունքայնությունը: Բայց կրկնում եմ' իր իրավունքն է:

- ՀՀՇ-ի վերածննդի հայտարարությանը հաջորդեցին «Ազատ դեմոկրատներ»-ի լուծարման մասին խոսակցությունները, որքանո՞վ է այն իրական և հավանական:

- Լուծարման մասին խոսակցությունը հատուկ ծրագիր է: Ինչո՞ւ, բացատրեմ' զուտ լիբերալ կուսակցության առկայությունը քաղաքական դաշտում, բնականաբար, պետք է որոշակի մտավախություն առաջացնի, որովհետև չենք աշխատում նախորդ կամ մյուս կուսակցությունների շտամպերով, ոչ մեկին չենք հայհոյում, ոչ մի հացադուլ չենք անում, բայց իրատեսորեն ենք նայում պետական խնդիրներին, դիվանագիտությանը և այդ պրակտիկ մոտեցումը «վտանգավոր» է:

- «Ժառանգություն» կուսակցության գլխավոր քարտուղար Ստեփան Սաֆարյանը վերջերս հայտարարեց, թե «Ազատ դեմոկրատներ»-ն արհեստածին և PR-ի հիման վրա ստեղծված կուսակցություն է և, որ նրանց հետ «Ժառանգության» համագործակցությունը խորհրդարանական ընտրությունների ֆոնին սխալ էր: Ի դեպ, սա Րաֆֆի Հովհաննիսյանի կողմից թույլ տված քաղաքական սխալ, միայն ինքը չէ, որ համարում է:

- Ստյոպա Սաֆարյանն իմ ընկերն է և չի դադարում իմ ընկերը լինելուց նաև հիմա, նա ունի կարծիքի իրավունք: Ինչ վերաբերում է սխալին' եթե մեզանից «բաժանվելուց» հետո «Ժառանգություն»- ը շարքերով հաղթանակ տոներ, ապա գուցե ընդունեի իր ասածը, բայց փաստացի օրինակներով տեսնում ենք, որ բան չի փոխվել քաղաքական նվաճումների և քաղաքական գործառույթի մեջ, ուստի թույլ կտամ ինձ վերապահումով մոտենալ Սաֆարյանի տեսակետին:

-Նախագահական ընտրություններին «Ժառանգության» առաջնորդը ստացավ մոտ 40 տոկոս ձայն, դա մեծ նվաճում չէ՞:

- Ես ցավում եմ, որ չեմ առաջադրվել, որովհետև այդ դեպքում մենք կքննարկեինք, թե ով ինչքան է հավաքել: Եվ հետո' ձայնը տալիս են հակաիշխանական ամենապոտենցիալ թեկնածուին: Չմոռանանք, որ չառաջադրվեց Գագիկ Ծառուկյանը, Լևոն Տեր-Պետրոսյանը: Այս իրավիճակում այն իրադրության հաղթանակ էր և ոչ կոնկրետ ուժի:

- Գուցե որոշեք մասնակցե՞լ մյուս նախագահական ընտրություններին:

- Ես չեմ սիրում երկարաժամկետ ծրագիր կազմել, որովհետև կառավարության օրինակով տեսնում ենք' երկարաժամկետ ծրագրերն են կործանում Հայաստանը: Ես կողմ եմ կարճաժամկետ, իրատեսական մշակումներին:

- Լավ, «Ազատ դեմոկրատներ»-ի և «Ժառանգության» պատգամավորների միջև կա՞ մրցակցություն' հաշվի առնելով «ամուսնալուծությունը»:

- Ինչի՞ մրցակցություն, ես ուրախ կլինեի, եթե լիներ կոնստրուկտիվ ծրագրերի և առավել տարողունակ հայտարարությունների մրցակցություն և ոչ անձնական:

- Վերջին հարցը' միակ ընդդիմադիր ուժի' «Ժառանգության» ներկայությունը քաղաքապետարանում իրավիճակային պատկերը կփոխի՞, կհաջողվի՞ նրանց զսպել իշխանական մեծամասնությանը:

- Նախօրոք կանխավարկած առաջ չեմ ուզում քաշել: «Ժառանգության» աշխատանքը կերևա և պետք է դիտարկել բուն աշխատանքային պրոցեսում:

Մարիամ Պետրոսյան