Այսօր առավոտյան հաճախորդները չեն կարողացել մտնել Բելառուսում Իսրայելի հյուպատոսական բաժին, որովհետև դեսպանատունը գործադուլ է հայտարարել: Այս մասին հաղորդում է «gazetaby.com.» կայքը: Լրատվամիջոցը, հղում անելով դեսպանատան մամլո քարտուղար Օլգա Դմիտրովիչին, հաղորդում է, որ հաճախորդներին դեսպանություն չեն թողնում, որովհետև բաժինը, կապված հայտարարված գործադուլի հետ, վիզաներ չի տալիս: «Գործադուլ է անում Իսրայելի ԱԳՆ-ն: Իսրայելը ժողովրդավարական պետություն է, և գործադուլը հանդիսանում է սեփական իրավունքները պաշտպանելու միանգամայն օրինական և իրավաբանական պահանջ: Այս դեպքում ԱԳՆ-ի աշխատակիցները պայքարում են' սեփական իրավունքների համար և բարկության հասցեն ֆինանսների նախարարությունն է, որը մինչև հիմա չի արձագանքել գործադուլավորների պահանջներին: Անշուշտ, դեսպանությունը ներողամտություն է հայցում' պատճառած անհարմարությունների համար, բայց սա Իսրայելում տեղի ունեցած իրադարձությունների անդրադարձն է»,- Օլգա Դմիտրովիչի խոսքից մեջբերում է կայքը: Դեսպանությունում լրատվամիջոցին ասել են, որ չգիտեն, թե երբ կավարտվի գործադուլը և երբ կրկին կսկսվի քաղաքացիների ընդունելությունը: Կայքի հաղորդմամբ' Իսրայելի հյուպատոսությունները հաճախորդների ընդունելությունը ամբողջովին դադարեցրել են երկուշաբթի օրվանից՝ հունիսի 24-ից: Այդ երկրի արտաքին գործերի նախարարության աշխատանքային կոմիտեն հայտարարել է գործադուլային պատժամիջոցները սաստկացնելու մասին՝ ընդդեմ ֆինանսների նախարարության այն որոշման, որով ԱԳՆ-ի' գործադուլին մասնակցող աշխատակիցները զրկվում են արտաժամյա, տրանսպորտային և գործուղման վճարներից:
