Պետերբուրգի ոստիկանները ձերբակալել են Մուրմանսկի քրեական հեղինակություններից մեկի՝ Պյոտր Գուզիայի սպանության մեջ կասկածվողին: Ըստ քննության վարկածի' անցյալ ձմեռ տեղ գտած այդ սպանության դրդապատճառը եղել է վրեժը: Իրավապահները կասկածում էին, որ կատարողը սպանվածի երբեմնի հիմնական հակառակորդի՝ «Վոյնա» մականունով հայտնի «օրենքով գողի» որդին՝ 23-ամյա Անտոն Ակուլիչն է: Ակուլիչը ձերբակալվեց անցած շաբաթ օրը, հաղորդում է «fontanka.ru»-ն: Նրան սպառնում է 15 տարվա բանտարկություն: Սպանությունը կատարվել է 2013թ.-ի փետրվարի 28-ին Վիբորգյան մայրուղում: Նա դիմահայաց կրակ բացեց «Audi» ավտոմեքենայի վրա, որի մեջ գտնվում էր «օրենքով գող» Պյոտր Գուզիան: Ի դեպ, վերջինս ձգտում էր իր վերահսկողության տակ վերցնել Մոնչեգորսկի նիկելի գործարանից արտահանվող նիկելի նստվածքի տնօրինությունը: Վերջին 15 տարիներին Մոնչեգորսկի մետաղի համար մահացել են տասնյակ «գողականներ»: Իսկ 2001թ.-ին Պետերբուրգի «Կարելիա» հյուրանոցի մոտ նույնիսկ սպանվեց ոստիկանության կապիտան Եվգենի Մալիկովը, ով փորձում էր մասնակցություն ունենալ այդ գործընթացներում, նշում է կայքը: «Օրենքով գողի» սպանության քննության ընթացքը հանգեցրեց այն վարկածին, ըստ որի կասկածի տակ հայտնվեց ծագումով «գողական դինաստիայի» ներկայացուցիչ, լողի գծով սպորտի վարպետության թեկնածու Անտոն Ակուլիչը' Գուզիայի կողմից սպանված «Վոյնա» -ի որդին: 2007թ.-ին Անտոն Ակուլիչը անօրինական զենք պահելու մեղադրանքով դատապարտվեց ազատազրկման: Իսկ 2008-ի փետրվաի 28-ին Գուզիան սպանեց նրա հորը: Բանտարկության ժամկետը լրանալուց և ազատ արձակվելուց հետո Անտոն Ակուլիչը տեղափոխվեց Պետերբուրգ: Նա որոշել էր հրաժարվել քրեական ապրելակերպից: Սակայն 2012թ.-ի Պյոտր Գուզիայի հետ երես առ երես հանդիպումը ամեն ինչ փոխեց նրա պլաններում: «Ես քեզ կհանգստացնեմ, ինչպես հանգստացրի հորդ»,- ասել էր Պյոտր Գուզիան: «Հենց այդ խոսքերով էլ նա իր դատավճիռը կայացրեց»: Անտոն Ակուլիչը նրան սպանեց Վիբորգյան մայրուղում: Նա միաժամանակ կրակել էր երկու հրազենից, մի ձեռքում «ՏՏ» ատրճանակ, մյուսում՝ նագան: Հարուցվեց քրեական գործ ՌԴ քրեական օրենսգրքի «Հանկարծակի առաջացած անբարյացակամ հարաբերությունների հողի վրա կատարված սպանություն» հոդվածի հատկանիշներով: Անտոն Ակուլիչը ձերբակալվեց հուլիսի 19-ի առավոտյան, Վասիլևյան կղզում գտնվող այն կոմունալ բնակարանում, որտեղ ապրում էր մի աղջկա հետ: Նա արդեն խոստովանել է իր մեղք: