Գերմանիայի կողմից Եվրախորհրդարանի պատգամավոր Վիոլա Ֆոն Կրամոնը հանդես է եկել Եվրախորհրդարանի որոշման հետ կապված հայտարարությամբ, ըստ որի' հոկտեմբերի 9-ին Ադրբեջանում կայանալիք նախագահական ընտրություններին պետք է ուղարկվի դիտորդական առաքելություն իրականացնող պատվիրակություն. փոխանցում է Turan-ը:
«Մենք ողջունում ենք Եվրախորհրդարանի որոշումը դիտորդական առաքելություն ուղարկել Ադրբեջանում կայանալիք նախագահական ընտրությունների համար:
Հուսով ենք, որ Եվրախորհրդարանի առաքելությունը կնպաստի, որ ժողովրդավարական ընդդիմությունը կարողանա մրցակցել ընտրություններում:
Մենք քննադատում ենք Ադրբեջանի կառավարությանը ժողովրդավարական ընդդիմության թեկնածուին ընտրական գործընթացից հեռացնելու համար»,-ասվում է հայտարարության մեջ:
Այնուհետև պատգամավորը նշում է, որ «Ադրբեջանում մարդու իրավունքների հետ կապված իրավիճակի զարգացումը անհանգստություն է առաջացնում»: Այսպես օրինակ, իշխանություններն արգելում են ազատ և խաղաղ ժողովներն ու միությունները:
Պաշտոնական Բաքուն քննադատության է ենթարկվել նաև ընդդիմադիր քաղաքական ակտիվիստների հետապնդման համար. գրում է haqqin.az-ը:
