«Քաղաքացիական պայմանագիր» նախձեռնությունն այսօր մամուլի ասուլիս էր հրավիրել, որից հետո PressIdent.am-ը զրուցեց այդ նախաձեռնության կառավարման խորհրդի անդամ  Նիկոլ Փաշինյանի հետ:

- Պարոն Փաշինյան, այժմ  բանակցություններ են ընթանում քառյակի ձևաչափով, որի մասին Ձեր դիրքորոշումն արդեն հայտնի է: Դուք աձանձնացաք ՀԱԿ-ից և ի՞նչ եք կարծում՝ արդոք հենց ընդդիմադիր ուժերի պառակտվելը չի պատճառը, որ իշխանափոխություն այդպես էլ չի լինում:

- Նախ ուզում եմ ասել, որ թյուրըմբռնում կա, ոչ թե ես եմ առանձնացել Հայ ազգային կոնգրես դաշինքից, այլ Հայ ազգային կոնգրես կուսակցությունն է առանձնացել Հայ ազգային կոնգրես դաշինքից: Դրանք տարբեր բաներ են:

Ինչ վերաբերում է միավորումներին և պառակտումներին, երրորդ հանրապետության պատմությունը ցույց տվեց, որ միավորումները պետք է լինեն կոնկրետ ձևակերպված հանրության համար շատ հստակ, տեսանելի և հասանելի նպատակների ու խնդիրների շուրջ:  Համախմբվել ուղղակի համախմբվելու համար, նշանակում է պառակտվել ուղղակի պառակտվելու համար: Մենք պետք է ունենանք շատ հստակ ձևակերպված նպատակներ` ինչի՞ համար ենք մենք համախմբվում, ո՞ւր ենք գնում: Սա է խնդիրը, և մեր այս քաղաքական գործընթացի կարևորագույն իմաստը հետևյալն է` քաղաքական  համագործակցությունների հիմքում դնել բովանդակություն, ավելի խորքային, հեռահար և ժամկետային բովանդակությունը:

- Հեռուստատեսային հարցազրույցներից մեկում ներողություն եք խնդրել մինչ օրս եղած բացթողումների համար: Կնշե՞ք հիմնական բացթողումները:

- Ինձ համար ներողություն խնդրելն ուղղակի բառ չէ, դա պետք է արտահայտվի նաև գործով: Այս գործը մենք անում ենք նախկինում թույլ տված սխալները չկրկնելու, բայց նախկինում առաջադրված նպատակներին հասնելու համար: Հիմնական խնդիրն ինստիտուցիոնալ ընդդիմության հետ կապված խնդիրն է, որը այսօր պետք է լուծենք:

- Ասուլիսի ժամանակ Ձեր խոսքում նշեցիք, որ եթե սկսեք Սերժ Սարգսյանի հեռացման գործընթաց, մեկ ամիս անց ինքը հեռացված կլինի: Շատ պատասխանատու հայտարարություն է: Ի՞նչ եք կարծում, կկարողանա՞ք հասնել նման արդյունքի:

- Այն ժամանակ, երբ մենք կասենք` ժողովուրդ հրավիրում ենք ձեզ Ազատության կամ որևէ այլ հրապարակ` Սերժ Սարգսյանի հեռացմանը հասնելու համար, իմացեք, որ մենք մեկ ամիս անց կլուծենք այդ խնդիրը: Եթե մեկ ամիս հետո այդ խնդիրը չենք լուծի, մարդկանց չենք խաբի` ուղղակի հավաքելու համար:

-Այս պահին այդ ճանապարհին որո՞նք են ամենաբարդ խնդիրները:

- Ինստիտուցիոնալ ընդդիմության ձևավորումն է, ապագա Հայաստանի նախագծի ձևակերպումը և այդ նախագծի շուրջ հանրային համաձայնության ձևավորումը:

Ամալյա Հովհաննիսյան