Երևանի քաղաքապետարանում ամփոփվել և պատասխանատու ստորաբաժանումներին են հասցեագրվել հուլիսին և օգոստոսի առաջին տասնօրյակում Երևանի վարչական շրջաններում տեղադրված «Առաջարկությունների արկղեր»-ով ստացված քաղաքացիների նամակները: Չնայած տարվա ոչ այնքան աշխույժ ժամանակահատվածին, դարձյալ քիչ չեն եղել: Առաջարկների գերակշիռ մասը վերաբերել է մայրաքաղաքում կանաչ գոտիների ընդլայնմանը, այգիների ու պուրակների ստեղծմանը, ինչպես նաև նոր հեծանվուղիների կառուցմանը: Ըստ այդմ, 2013 թվականից Երևանում հեծանվային մշակույթի տարածման միջոցառումների համատեքստում, այժմ ավարտական փուլում է Մաշտոցի պողոտայից մինչև Էրեբունի արգելոց-թանգարան ձգվող հեծանվուղու կահավորման և տեխնիկական զինման գործընթացը: Հեծանվուղին լավ նվեր կլինի հեծանվորդների համար և կներառի նաև Երևանի փողոցներով երթևեկելու ճամփորդական բաղադրիչը: Ինչ վերաբերում է մայաաքաղաքի կանաչ գոտիների ընդլայնմանը, ապա այս ուղղությամբ Երևանի քաղաքապետարանում մշակվել է ծրագրային փաթեթ, որը մինչև տարեվերջ կյանքի կկոչվի:
Երևանի քաղաքապետ Տարոն Մարգարյանի անմիջական նախաձեռնությամբ Երևանի վարչական բոլոր շրջանների մարդաշատ վայրերում տեղադրվել են «Առաջարկությունների արկղեր»: Դրանք հնարավորություն են տալիս երևանցիներին մայրաքաղաքի զարգացման, բարեկարգման վերաբերյալ իրենց առաջարկներն ուղղել քաղաքապետարանին։ Այդ առաջարկներից շատերը թեև ընդգրկվել են քաղաքապետարանի 2014 թվականի ծրագրերում, այդուհանդերձ, առանձին դեպքերում, օրինակ բակերի բարեկարգման մասով, կյանքի են կոչվում' հաշվի առնելով առաջարկներում նշված բաղադրիչները:
