Աշխարհի ավելի քան 40 երկրում հոկտեմբերի 29-ը նշվում է որպես կաթվածի (ինսուլտի) դեմ պայքարի համաշխարհային օր: Ամբողջ աշխարհում խնդրի լուծման համար ամենից շատ կարևորվում են կանխարգելիչ միջոցառումները: Դրանցից շատերն անցկացվում են հենց գլխուղեղի կաթվածի դեմ պայքարի օրվա (World Stroke Day) շրջանակում, որը 2004թ. սահմանվել է Գլխուղեղի կաթվածի դեմ պայքարի համաշխարհային կազմակերպության (World Stroke Organization, WSO) կողմից:
Հայաստանում տարեկան արձանագրվում է ուղեղի անոթային հիվանդությունների ավելի քան 5 հազար դեպք: Դրանց կեսն ունենում է մահվան ելք, իսկ մյուս կեսը ձեռք է բերում տարբեր աստիճանի հաշմանդամություն: 2013թ. ուղեղի անոթային ընդհանուր հիվանդացությունը մեր երկրում կազմել է 651.2' 100 հազար բնակչի հաշվով: 2000թ. համեմատ (447.1) հիվանդությունն աճել է 1.4 տոկոսով:
Հիվանդացության աճը պայմանավորված է նաև բնակչության շրջանում զարկերակային գերճնշման բարձր տարածվածությամբ, որը հաճախ թաքնված է կամ ուշ է ախտորոշվում: Հիվանդացության աճին նպաստել է նաև դիմելիության աճը, ինչն առողջապահության համակարգում իրականացվող բարեփոխումների արդյունք է:
Ուղեղի անոթային հիվանդությունների հիմնախնդիրը և ամենամյա աճը առաջնահերթ լուծում պահանջող խնդիրներից մեկն է:
Հիվանդության դեմ պայքարից անմասն չի մնացել նաև Հայաստանը: 2014թ. մայիսին Երևանի Մ. Հերացու անվան պետական բժշկական համալսարանի «Հերացի» թիվ 1 համալսարանական հիվանդանոցում բացվել է նյարդավիրաբուժության և գլխուղեղի կաթվածների բուժման մասնագիտացված կենտրոն, որը ղեկավարում է ԵՊԲՀ նյարդավիրաբուժության ամբիոնի վարիչ, պրոֆեսոր Ռուբեն Ֆանարջյանը: Կենտրոնում առկա են բոլոր հնարավորությունները՝ նյարդաբանական հիվանդությունների ախտորոշման և բուժման համար: Հիվանդները գլխուղեղի կաթվածի վիրահատության համար այլևս արտասահման մեկնելու կարիք չունեն:
