Եգիպտոսի ավելի քան 25 հազար քաղաքացի հեռացել է Լիբիայից այն բանից հետո, երբ «Իսլամական պետություն» ահաբեկչական խմբավորման գրոհայինները քրիստոնյա եգիպտացիների զանգվածային սպանություն են իրականացրել երկրում: Այս մասին հայտնել է Daily mail կայքը' հղում անելով Եգիպտոսի արտաքին գործերի նախարարությանը:
21 407 մարդ Եգիպտոս է մուտք գործել Սոլումա շրջանում սահմանային անցակետով: Եվս 4122 մարդ հեռացել է Թունիս, իսկ այդտեղից Եգիպտոս ժամանել ավիաչվերթներով:
Մինչ 2011 թվականին Մուամմար Քադաֆիի ռեժիմի անկումը Լիբիայում աշխատել է մոտ 1,5 միլիոն եգիպտացի, որոնց մեծ մասը հետագայում լքել է երկիրը մարտական գործողությունների և քաղաքական անկայունության պատճառով:
Վերջերս համացանցում տարածվել է տեսանյութ, որտեղ «Իսլամական պետության» գրոհայինները գլխատում են 21 ղպտի եգիպտացու Միջերկրական ծովի ափին:
Հաղորդվում է, որ «Իսլամական պետության» մոտ պատանդառության մեջ է գտնվում սիրիայում առևանգված ավելի քան 200 քրիստոնյա:
