Երևանի քաղաքապետի տեղակալ Տիգրան Ավինյանը 2022 թվականի ընթացքում իր հորից՝ Արմեն Ավինյանից, որպես նվիրատվություն ստացել է Volkswagen մակնիշի ավտոմեքենա և 11 միլիոն դրամ։ Այս մասին տեղեկանում ենք Տիգրան Ավինյանի 2022 թվականի գույքի և եկամուտների տարեկան հայտարարագրից, որը հրապարակվել է Կոռուպցիայի կանխարգելման հանձնաժողովի հայտարարագրերի ռեեստրում։

 Բնամթերք-ավտոմեքենան

Տիգրան Ավինյանի հայտարարագրի տրանսպորտային միջոցների բաժնում նշված է, որ նա 2022 թվականի ընթացքում վաճառել է իրեն պատկանող Honda մակնիշի ավտոմեքենան (2014թ․ արտադրության)։ 2022թ․ մայիսին Տիգրան Ավինյանը իր հորից՝ Արմեն Ավինյանից, նվիրատվություն է ստացել 2021թ․ արտադրության Volkswagen մակնիշի ավտոմեքենա։ Ավինյանի եկամուտներում նաև մեկ այլ նվիրատվություն է նշված՝ կրկին իր հորից, 11 միլիոն դրամի չափով։

Այստեղ հետաքրքրականն այն է, որ նույն եկամուտների բաժնում Ավինյանը հայտարարագրել է 19 մլն դրամ նվիրատվություն իր հորից՝ որպես բնամթերային ձևով ստացված եկամուտ։ Թե ինչ բնամթերքի մասին է խոսքը, պարզաբանում ստանալու նպատակով զանգահարեցինք Տիգրան Ավինյանին։ Նա մեզ հետ զրույցում նշեց, որ 19 միլիոն դրամը նույն Volkswagen-ի գինն է, որը նվեր է ստացել հորից, և որն ըստ Ավինյանի՝ հայտարարագրերի լրացման ուղեցույցներով եկամուտների բաժնում նշվում է որպես բնամթերային եկամուտ։ Ավինյանը նշեց, որ մեքենան Volkswagen iD.4 է, որը ձեռք են բերել ավտոսրահից։

Կոռուպցիայի կանխարգելման հանձնաժողովի հայտարարագրերի վերլուծության վարչության պետ Կարեն Հակոբյանը «Հետքին» պարզաբանեց, որ եթե պաշտոնատար անձը տարվա ընթացքում ոչ դրամական նվիրատվություն է ստանում, ապա դա եկամուտների մեջ նշվում է որպես բնամթերային ձևով ստացված եկամուտ։

Տիգրան Ավինյանը մեզ հետ զրույցում չցանկացավ անդրադառնալ հոր մյուս նվիրատվությանը՝ 11 միլիոն դրամին՝ ասելով, թե դա պաշտպանված ինֆորմացիա է, և չի ցանկանում մեկնաբանել ընտանեկան հարցերը։ 

Աշխատավարձերն ու կրիպտոբիզնեսը

Եկամուտների բաժնում Երևանի փոխքաղաքապետ Տիգրան Ավինյանը հայտարարագրել է աշխատավարձ Երևանի քաղաքապետարանից՝ 3 մլն 704 հազար դրամի չափով, Զանգեզուրի պղնձամոլիբդենային կոմբինատից՝ 5 մլն 212 հազար դրամի չափով, ինչպես նաև 13 մլն 195 հազար դրամ՝ «Հայբիզնեսբանկից»։

««Հայբիզնեսբանկի» և Զանգեզուրի կոմբինատի դեպքում դրանք եղել են իմ աշխատավարձերը՝ որպես այդ կազմակերպությունների խորհրդի անդամ»,- նշեց Ավինյանը։ 

Ծախսերի հատվածում Տիգրան Ավինյանը հայտարարագրել է 11 մլն 995 հազար դրամ։ Հարցին, թե ինչ նպատակով է ծախսվել այդ գումարը, Ավինյանը նշեց, որ դա ավելի շատ ոչ թե ծախս է, այլ՝ ներդրում, և ինքն այդ գումարով գնել է բիթքոյնի կրիպտոմայներներ։ Միևնույն ժամանակ Ավինյանն իր եկամուտներում հայտարարագրել է 5 մլն 412 հազար դրամ, որի եկամուտ վճարող կազմակերության դաշտում նշված է Poolin: Սա կրիպտոմայնիգնի ամենամեծ հարթակներից է։ Ավինյանն իր այս եկամուտը բացատրեց որպես իր գնած մայներներից ստացված եկամուտ։

Տարեսկզբին Տիգրան Ավինյանը իր բանկային հաշվիների վրա ունեցել է 387 հազար դրամ, իսկ տարեվերջին՝ 1 մլն 890 հազար դրամ։ Կանխիկ դրամով Ավինյանը հայտարարագրել է 3000 ԱՄՆ դոլար, ինչպես նաև 12,5 մլն դրամ, որը տարեսկզբին եղել է 26,3 մլն։ Երևանի փոխքաղաքապետը դրամական միջոցների բաժնում նշել է նաև կրիպտո, սակայն թե ինչ արժույթ, նշված չէ։

Որպես անշարժ գույք Տիգրան Ավինյանը հայտարարագրել է Երևանում գտնվող ավտոտնակը՝ ձեռք բերված 2014 թվականին։

Տիգրան Ավինյանի կնոջ հայտարարագիրը

Տիգրան Ավինյանի կինը՝ Մարիամ Պահլավունին, իր եկամուտներում հայտարարագրել է 11,3 մլն դրամ նվիրատվություն Տիգրան Ավինյանից և 19 մլն 640 հազար դրամ նվիրատվություն՝ իր ամուսնու հորից՝ Արմեն Ավինյանից։ Դրամական միջոցներում Մարիամ Պահլավունին տարեսկզբի համար հայտարարագրել է 237 հազար դրամ բանկային հաշիվներին, իսկ տարեվերջին անկանխիկ գումար չի նշել։ Կանխիկ գումարով Պահլավունին հայտարարագրել է 1,3 մլն դրամ՝ տարեվերջին, իսկ տարեսկզբին՝ 0 դրամ։

Մարիամ Պահլավունին անշարժ գույք չի հայտարարագրել։ Իսկ որպես տրանսպորտային միջոց նշել է 2017թ․ արտադրության Range Rover-ը՝ գնված 2020 թվականին։

Մարիամ Պահլավունին բաժնային մասնակցություն ունի նաև երկու առևտրային կազմակերպություններում, որոնց մասին նա իր հայտարարագրում չի հիշատակել։ Փոխարենն այդ մասին նշված է Տիգրան Ավինյանի շահերի հայտարարագրում։ Ըստ այդ տվյալների՝ փոխքաղաքապետի կինը 34 % բաժնեմաս ունի «Լավ Փրոդաքթս» ՍՊԸ-ում, որը հիմնադրվել է2021թ․ սեպտեմբերի 22-ին և ըստ ՊԵԿ-ի տվյալների՝ զբաղվում է ոչ մասնագիտացված մեծածախ առևտրով։ 2023թ․ մարտի 22-ին էլ Մարիամ Պահլավունին հիմնադրել է (100 %) «Օրոր Թոյզ» ՍՊԸ-ն, որը զբաղվում է խաղերի և խաղալիքների մեծածախ առևտրով։