Hetq.am. Ինչպես արդեն հայտնի է, Երևանի քաղաքապետարանը «սիրում» է որոշումներ ընդունել' առանց օրենքները հարգելու: Սակայն վճարովի կայանատեղիների վերաբերյալ ավագանու՝ դեկտեմբերին կայացրած որոշումը կուլիմինացիոն է: Թվարկենք դրա հիմնական ապօրինությունները.
1. Անդորրագիր չկա
Այսպիսով, ըստ «Ավտոտրանսպորտային միջոցների կայանատեղերի տեղական տուրքի մասին» ՀՀ օրենքի 9-րդ հոդվածի 6-րդ կետի, «Ավտոկայանատեղի տուրք գանձող մարմինը պարտավոր է տուրք վճարողին տրամադրել վճարումը հավաստող անդորրագիր, ինչպես նաև, պահանջելու դեպքում, տուրք վճարողին տրամադրել վճարման վերաբերյալ տեղեկատվություն»:
Բայց, ի հեճուկս օրենքի, ուղարկված SMS-ի դիմաց վարորդներին ոչ ոք անդորրագիր չի տալիս: Դա ոչ միայն վարորդների իրավունքների և օրենքի խախտում է, այլև պաշտոնյաներին՝ SMS-ներից ստացված գումարները գրպանելու հնարավորություն է տալիս:
2. Րոպեավճարի փոխարեն ժամավճար է
Համաձայն նույն օրենքի 10-րդ հոդվածի՝ եթե վարորդը նախընտրում է ժամավճարի տարբերակը (և ոչ օր/շաբաթ/ամիս/տարի համակարգը), ապա իրենից գանձվում է միայն փաստացի կանգնած րոպեների գումարը:
Այսինքն, եթե մեկ ժամվա կայանման գինը 100 դրամ է, ապա, օրինակ, կես ժամ կանգնելուց պետք է գանձվի 50 դրամ, 1 ժամ և 15 րոպե կանգնելուց' 125 դրամ և այլն (րոպեն 1 դրամ և 67 լումա սակագնով):
Սակայն, խախտելով օրենքը, մեկ ժամվա գումարը գանձվում է կայանված յուրաքանչուր ամբողջ և ոչ ամբողջ ժամվա համար:
3. Տեսախցիկներով տուգանելու իրավունքը միայն Ոստիկանությունն ունի
Համաձայն «Տեսանկարահանող կամ լուսանկարահանող սարքերով հայտնաբերված ճանապարհային երթևեկության կանոնների խախտումների վերաբերյալ գործերով իրականացվող վարչական վարույթի առանձնահատկությունների մասին» ՀՀ օրենքի, տեսախցիկներով խախտումներ արձանագրելու և դրանցով տուգանքներ նշանակելու իրավունք ունի միայն ՀՀ ոստիկանության «Ճանապարհային ոստիկանության» ծառայությունը (հոդված 2, մաս 1, կետ 3):
Այնինչ, Երևանի քաղաքապետարանը, խախտելով օրենքը, որոշել է ապօրինաբար տեղեկություններ հավաքել վարորդների մասին և ապօրինաբար ստացված ապացույցներով տուգանել վարորդներին:
4. Տուգանողը ՍՊԸ է
Համաձայն Վարչական իրավախախտումների մասին օրենսգրքի 219.1 հոդվածի, վճարովի կայանատեղիում կայանած և տուրքը չվճարած վարորդին պետք է տուգանի տեղական ինքնակառավարման մարմինը (Երևանի քաղաքապետարանը): Բայց, քաղաքապետարանի չարաբաստիկ որոշման համաձայն, խախտման արձանագրություն կազմողը մասնավոր ընկերություն է:
Այսինքն, ի հեճուկս օրենքի, ինչ-որ մասնավոր կազմակերպություն ստացել է քաղաքացիներին տուգանելու իրավունք:
5. Վարորդների մասին տվյալների բազան տվել են ՍՊԸ-ին
Համաձայն քաղաքապետարանի (ավելի ճիշտ՝ Երևանի ավագանու) որոշման, «լիազորված» մասնավոր ընկերությունը տուգանքներն ուղարկելու է մեքենաների սեփականատերերին: Սակայն որտեղի՞ց մասնավոր ընկերությունը պետք է իմանա, թե որ պետհամարանիշի մեքենայի սեփականատերն ով է:
Ստացվում է, որ, ի հեճուկս սահմանադրության, պետական մարմինները բոլոր մեքենատերերի մասին տեղեկությունները փոխանցել է ինչ-որ մասնավոր ընկերության:
Մեկնաբանություններն ավելորդ են:
